Uyghurlar jenwediki b d t binasi aldida zor kölemlik namayish qildi

Muxbirimiz eziz
2018-11-06
Élxet
Pikir
Share
Print

Xitay hökümitining insan heqliri xizmitini bahalash meqsitide 6-noyabir küni b d t ning jenwediki shtabida ötküzülgen chong yighin jeryanida dunyaning herqaysi jayliridin toplan'ghan Uyghurlar naraziliq namayishi teshkillep, xitay hökümitini qattiq eyiblidi.

Amérika, türkiye, gérmaniye, firansiye we bashqa yawropa elliridin toplan'ghan zor sandiki Uyghur muhajiri ay yultuzluq kök bayraqni kötürginiche b d t binasi aldida namayish qilip, xitay hökümitini qirghinchiliqni toxtitishqa, lagérlarni derhal bikar qilishqa, qolgha élin'ghan barliq bigunah Uyghurlarni shertsiz qoyuwétishke chaqirdi.

Birleshme agéntliqning 6-noyabirdiki xewiride éytilishiche, xitay hökümitining mu'awin tashqi ishlar ministiri li yüchéng jenwediki yighinda söz qilghan hemde xitaydiki insan heqlirining zor tereqqiyatlargha érishkenlikini tekitligen. Shuningdek lagérlar mesiliside söz qilip: "Bezi döletler qesten'ge bu ishlarni siyasiy jehettin burmilashqa urunuwatidu" dep gherb ellirini eyibligen. Xitay ömiki terkibidiki wekillerdin ürümchi shehirining bashliqi yasin sidiq "Qaranglar, ötken 21 ayda shinjangda héchqandaq térrorluq weqesi körülmidi. Buning sewebi ilgiri térrorluq we esebiylik idiyeliri bilen zeherlen'genler hazir terbiyelesh arqiliq bu idiyelerdin xalas boldi" dégen.

Namayish meydanidiki Uyghurlardin d u q ning re'isi dolqun eysa bu heqte muxbirlarning so'allirigha jawab bérip: "Xitay hökümitining sherqiy türkistandiki Uyghurlargha wehshiyane zulum séliwatqanliqigha bolghan ghezep-nepritimizni ipadilesh üchün bu yerge namayishqa kelduq" dégen. Shundaqla b d t ning xitay hökümitige qarita konkrét birer herikette bolushini telep qilghan.

Toluq bet