Җәнвәдә ечилған кишилик һоқуқ вә демократийә учришиш йиғиниға уйғур вәкиллири қатнашти

Кишилик һоқуқ вә демократийә үчүн җәнвә алий учришиши намлиқ хәлқара йиғин 23-феврал җәнвәдә башланди. Уйғурларға вакалитән дуня уйғур қурултийиниң иҗраийә һәйәт мудири долқун әйса вә нөвәттә явропада муһаҗирәттә яшаватқан уйғур паалийәтчиси, сабиқ дипломат кирәм шерип қатнашқан.

Долқун әйсаниң билдүрүшичә, йиғинниң сәйшәнбә күни чүштин кейин ечилған хитай вәзийити һәққидики музакирисидә, б д т ниң кишилик һоқуқ кеңишиниң даимий һәйәтлириниң бири болған хитайниң өзидики демократийә вә кишилик һоқуқ вәзийити мәсилиси, хитай һөкүмитиниң уйғур, тибәт қатарлиқ милләтләргә қаратқан сиясити вә бу районлардики вәзийәт қатарлиқлар оттуриға қоюлған.

Бу йиғинға дуняниң һәрқайси җайлиридин кәлгән дөләт, һөкүмәт әмәлдарлири, кишилик һоқуқ вә демократийә паалийәтчилири, сиясәтчиләр болуп 500 дин артуқ киши қатнашқан болуп, йиғинда уйғурларға вакалитән қатнашқан йәнә бир вәкил керәм шерип, өткән әсирниң 80-йиллириниң ахири хитайниң пакистан әлчиханисида дипломат болуп ишлигән мәзгилидә, хитай тәрипидин тутуш тизимликидә исми чиққан, пакистандики уйғурларға ярдәм бәргәнлики ашкариланғандин кейин, хитайниң пакистандики әлчиханисидин қечип кетип, кейин б д т дин панаһлиқ тилигән, нөвәттә у шивитсарийидә уйғур даваси қиливатқан паалийәтчиләрниң биридур.