Америка президенти доналд трамп уйғур паалийәтчи җәвһәр илһам билән ақ сарайда көрүшти

Мухбиримиз алим сейитоф
2019-07-18
Елхәт
Пикир
Share
Принт

Америка президенти доналд трамп чаршәнбә күни чүштин кейин уйғур паалийәтчи җәвһәр илһам қатарлиқ 27 вәкилни ақ сарайға тәклип қилип, улар билән көрүшти.

Бу вәкилләр асасән хитай, шималий корейә, бирма, иран вә түркийә қатарлиқ дөләтләрниң диний зиянкәшликигә учриғанлар болуп, бу вәкилләр америка ташқи ишлар министирлиқи хәлқаралиқ диний әркинликни илгири сүрүш министирлар йиғиниға кәлгән меһманлардин тәшкил тапқан.

Президент трамп улар билән көрүшкинидә: «бүгүн биз билән биргә болғанлар болса охшаш болмиған дөләтләрдин кәлгән охшаш болмиған диний әнәнигә етиқад қилидиған әр-аяллардур. Һәммиңларниң ортақлиқи болса һәр бириңлар өз дөлитиңларда диний етиқадиңлар үчүн зор зиянкәшликкә учридиңлар. . . Биз америкида һәр даим һоқуқларниң һөкүмәттин әмәс, бәлки яратқучидин келиду дәп чүшинимиз» дегән.

Уйғур паалийәтчи җәвһәр илһам президент трампқа: «мениң дадамни өз ичигә алған 1-3 милйон уйғур хәлқи һазир хитайниң йиғивелиш лагерлирида соланмақта. Мениң дадам һазир муддәтсиз қамақта ятмақта» дәп сөзи техи ахирлашмиғинида, президент трамп җәвһәрдин: «сизниң дадиңиз түрмидә ятқили қанчә йил болди?» дәп сориди. Җәвһәр җавабән: «у түрмидә ятқили 5 йил болди. У йәнә түрмидә қанчилик ятиду уни билмәймиз» деди.

Америка президенти трампниң җәвһәр илһам қатарлиқ уйғур вә башқа милләт вәкиллири билән ақ сарайда көрүшүши 800 миңдин 2 милйонғичә уйғур хитайниң лагерлириға соланған бир вәзийәткә тоғра кәлгәнлики үчүн буниңдин уйғурлар наһайити хош болди.

Җәвһәр илһам мәшһур уйғур профессор илһам тохтиниң қизи болуп, хитай һөкүмити дадисиниң тинчлиқ билән елип барған паалийәтлири үчүн 2014-йили муддәтсиз қамақ җазиси бәргән. Америка һөкүмити буниңға қаттиқ наразилиқ билдүрүп, хитай һөкүмитидин профессор илһам тохтини қоюп беришкә чақириқ қилған. Йеқинда америка дөләт мәҗлис әзалиридин марко рубийо уни 2019-йиллиқ нобел тинчлиқ мукапатиға намзатлиқиға көрсәткән.

Пикирләр (0)
Share
Толуқ бәт