Amérika prézidénti donald tramp Uyghur pa'aliyetchi jewher ilham bilen aq sarayda körüshti

Muxbirimiz alim séyitof
2019-07-18
Share

Amérika prézidénti donald tramp charshenbe küni chüshtin kéyin Uyghur pa'aliyetchi jewher ilham qatarliq 27 wekilni aq saraygha teklip qilip, ular bilen körüshti.

Bu wekiller asasen xitay, shimaliy koréye, birma, iran we türkiye qatarliq döletlerning diniy ziyankeshlikige uchrighanlar bolup, bu wekiller amérika tashqi ishlar ministirliqi xelq'araliq diniy erkinlikni ilgiri sürüsh ministirlar yighinigha kelgen méhmanlardin teshkil tapqan.

Prézidént tramp ular bilen körüshkinide: “Bügün biz bilen birge bolghanlar bolsa oxshash bolmighan döletlerdin kelgen oxshash bolmighan diniy en'enige étiqad qilidighan er-ayallardur. Hemminglarning ortaqliqi bolsa her biringlar öz dölitinglarda diniy étiqadinglar üchün zor ziyankeshlikke uchridinglar. . . Biz amérikida her da'im hoquqlarning hökümettin emes, belki yaratquchidin kélidu dep chüshinimiz” dégen.

Uyghur pa'aliyetchi jewher ilham prézidént trampqa: “Méning dadamni öz ichige alghan 1-3 milyon Uyghur xelqi hazir xitayning yighiwélish lagérlirida solanmaqta. Méning dadam hazir muddetsiz qamaqta yatmaqta” dep sözi téxi axirlashmighinida, prézidént tramp jewherdin: “Sizning dadingiz türmide yatqili qanche yil boldi?” dep soridi. Jewher jawaben: “U türmide yatqili 5 yil boldi. U yene türmide qanchilik yatidu uni bilmeymiz” dédi.

Amérika prézidénti trampning jewher ilham qatarliq Uyghur we bashqa millet wekilliri bilen aq sarayda körüshüshi 800 mingdin 2 milyon'ghiche Uyghur xitayning lagérlirigha solan'ghan bir weziyetke toghra kelgenliki üchün buningdin Uyghurlar nahayiti xosh boldi.

Jewher ilham meshhur Uyghur proféssor ilham toxtining qizi bolup, xitay hökümiti dadisining tinchliq bilen élip barghan pa'aliyetliri üchün 2014-yili muddetsiz qamaq jazisi bergen. Amérika hökümiti buninggha qattiq naraziliq bildürüp, xitay hökümitidin proféssor ilham toxtini qoyup bérishke chaqiriq qilghan. Yéqinda amérika dölet mejlis ezaliridin marko rubiyo uni 2019-yilliq nobél tinchliq mukapatigha namzatliqigha körsetken.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet