Kelgüsi prézidént jow baydin xitay we hindistanda zulum körüwatqan musulmanlarning haligha yétishke chaqirildi
Amérikaning yéqinda wezipe tapshurup alidighan prézidénti jow baydin xitay we hindistan qatarliq döletlerde zulumgha uchrawatqan musulmanlarning ehwaligha köngül bölüshke chaqirildi.
Bu chaqiriq “Tashqi siyaset” zhornilida amérikaning obama hökümiti we tramp hökümiti mezgilliride diniy az sanliqlargha munasiwetlik mesililerde meslihetchi wezipisi'ini ötigen sabiq meslihetchisi noks téymas teripidin élan qilin'ghan bolup, u bu maqaliside musulmanlarning ziyankeshlikke uchrash mesilisi jow baydinning eng muhim xizmet küntertipining biri bolushi kérek, dep körsetken.
U maqalisde özining 20 yilliq tekshürüsh we xizmet tejribisi boyiche dunyada eng köp zulumgha uchraydighanlarning musulmanlar ikenlikini, ularning peqet özliri az sanliq bolghan yerlerdila emes, belki musulman döletliridimu kishilik hoquq depsendichiliklirige uchraydighanliqini bildürgen.
U buningda xitay, hindistan, bérma we se'udi erebistan qatarliq döletlerni alahide tilgha alghan. U xitay heqqide toxtalghanda, xitayning islam dini we musulmanlargha qattiq ziyankeshlik qiliwatqanliqini, Uyghur rayonda qurulghan 1000 din oshuq lagérlarda az dégende bir milyon Uyghur musulman barliqini we ularning saqal qoyush, haraq ichmeslik we rozi tutushqa oxshash eng eqelliy diniy adetliri üchün ziyankeshlikke uchrawatqanliqini bayan qilghan.
Sabiq meslihetchi noks téymas xitayning iqtisadiy küchi seweblik islam döletliri teripidin we “Islam hemkarliq teshkilati” teripidinmu tenqidlenmeywatqanliqini eskertip, jow baydin hökümitining choqum bu döletlerni jazalishi kéreklikini we buning üchün choqum tramp hökümiti qollan'ghandek konkirét jaza tedbirlirini qollinishi kéreklikini bildürgen.