Xitay xelq qurultiyining wekili qurban niyaz “Jungxu'a medeniyiti” ni chongqur yiltiz tartquzushning shereplik wezipe ikenlikini bildürgen

Muxbirimiz jewlan
2022-03-04
Share

Xitay re'isi shi jinping atalmish “Jungxu'a milletlirining ortaq bir gewdisi” ni mustehkemlep, xitaydiki medeniyetlerning öz'ara yughurulushini tézlitip, az sanliq millet puqraliri, shundaqla yash-ösmürlerni “Jungxu'a milletliri bir a'ile” dégen ang boyiche terbiyelep, “Jungxu'a milliti” éngini kishilerning qelbige chongqur singdürüshni tekitlep kelgenidi.

Yéqinda xitayning “Tengritagh tori” qatarliq teshwiqat wasitiliride xitay xelq qurultiyining wekili bolup saylan'ghan qurban niyazning “Jungxu'a medeniyitini ma'arip bilen singdürüshtiki ilghar ish-izliri” we “Qimmetlik tejribiliri” alahide xewer qilin'ghan. Qurban niyaz 2003-yil aqsu uchturpan nahiyesi imamlirim bazirida “Dölet tili mektipi” qurghandin bashlap hazirghiche xitay tili we medeniyitini Uyghur balilirigha singdürüshte we awamgha terbiye bérishte sepning aldida mangghan aktiplardin bolup, xitay hökümitining köp qétim teqdirlishige érishken.

Xewerde éytilishiche, qurban niyaz aqsu tewesidila emes qeshqer, xoten, tashqorghan qatarliq jaylardimu köp qétim “Jungxu'a medeniyiti” ni tonushturup léksiye sözligen؛ xelqning barghanche xitayche sözleydighan, chaghanda juwawa tügidighan, ishikke xitayche mesnewi chaplaydighan bolup ketkinidin pexirlinidighanliqini éytqan qurban niyaz, ularni “Ilghar medeniyet bilen ozuqlandurush” ning müshkül, emma shereplik wezipe ikenlikini bildürgen.

Xitaychini we xitay medeniyitini Uyghur diyarigha “Chongqur yiltiz tartquzush” ta chong netije qazinip, xitay xelq qurultiyining wekili bolghan qurban niyaz yene 2022-yil béyjing qishliq olimpik musabiqisining mesh'ilini kötürgen. Yéqinda u xitay xelq qurultiyining béyjingda ötküzülgen yighinigha barghanda muxbirlargha öz tejribilirini sözligen bolup, érishken netijiliri bilen birge yene oqughuchilargha ders ötüshning tesliki, oqughuchi qobul qilishning tesliki, ata-anilarning buning ehmiyitini chüshenmeywatqanliqi dégendek qiyinchiliqlarni tilgha alghan.

Tehlilchilerning qarishiche, öz medeniyitini “Jungxu'a medeniyiti” dégen nam bilen Uyghurlargha téngiwatqan xitay hökümiti ishni awwal ma'ariptin we bu sahediki qurban niyazdek aktiplardin bashlighan bolup, awam xelqni baliliridin bashlap xitayche sözleydighan we xitay medeniyiti boyiche yashaydighan qilish üchün hessilep küch serp qilmaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet