Xitay hökümiti Uyghur rayonidiki bezi nahiyelerde "Jungxu'a medeniyet bazisi" qurushni bashlighan

Muxbirimiz jewlan
2021-05-19
Share

Xitay taratquliridin melum bolushiche, xitay hökümiti "Jungxu'a medeniyitini her jayda omumlashturush" pilani boyiche Uyghur aptonom rayonidiki bezi nahiyelerde qoyuq xitay medeniyiti tüsini alghan "Jungxu'a medeniyet bazisi" qurulushini bashlighan.

Xitay hökümiti 600 milyon yüen ajritip, qarasheher nahiyeside "Qedimiy yoldiki riwayet" témisida "Gherbke sayahet baziri" qurushni pilanlighan bolup, omumiy kölimi 300 mo, qurulush kölimi 200 ming kuwadrat métir kélidiken. Qurulush mes'ulining tonushturushiche, bu bazargha teqlidiy shekildiki qedimiy qurulushlar, muzéylar we yene köpligen terbiyelesh orunliri sélinip, "Jungxu'a en'eniwi medeniyiti" teshwiqati élip bérilidiken.

Uningdin bashqa, uchturpan nahiyesi imamlirim baziri "Aptonom rayonluq jungxu'a medeniyiti seynasi körgezme orni" 5-ayning 18-küni wéwiska ésip ish bashlighan bolup, Uyghur aptonom rayonluq medeniyet-sayahet nazaritining sékritari xo xenmin özi biwasite kélip, nahiyelik partkom sékritari bilen birlikte wéwiska asqan hemde bu orunni "Jungxu'a medeniyiti arqiliq shinjangni yashartish qurulushi" ning yene bir namayendisi süpitide teshwiq qilghan. Bu körgezme ornida xitay medeniyitige a'it xettatliq, resim körgezmisi, muzika, tiyatir, chaychiliq, qol hüner buyumliri qatarliq köpligen "Jungxu'a medeniyet pa'aliyetliri" ötküzülidiken.

Közetküchilerning qarishiche, xitay da'iriliri 20 yil mabeynide Uyghur medeniyitini suslashturushtin uni yoq qilishqa ötken bolup, qedimiy kochilar, binalar, meschitlerni chéqip weyran qilghan؛ alimlar, sen'etkarlar, hünerwenler, omumen Uyghur medeniyitini janlandurup kéliwatqan serxillarni nabut qilghan؛ xitay hökümiti bu boshluqni atalmish "Jungxu'a medeniyiti" arqiliq toldurushqa we bu arqiliq xitay éngini mejburiy singdürüshke urunmaqta iken. Xitayning bu medeniyet hujumi dawamlashqan muddetche Uyghur medeniyitining xaraplishish we untulush xewpi küchiyidiken, shunga dunya jama'etchiliki Uyghur medeniyitini qutquzush ishigha hergiz sel qarimasliqi kérek iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet