Бир қисим назир дәриҗилик кадирлар уйғурларға очуқ хәт елан қилди

Мухбиримиз үмидвар
2017-04-09
Share


Уйғур аптоном райони даирилири хотәнниң керийә наһийәси җай йезилиқ парткомниң муавин секритари, йеза башлиқи обулқасим мәттурсун язған "уйғур қериндашларға хитаб" намлиқ хәтни тарқитип, уйғур аптоном райониниң һәр қайси вилайәт, област, шәһәрләрдики, болупму уйғурлар бир қәдәр зич орунлашқан районлардики рәһбирий кадирлар арисида "үч хил күч"кә қарши күрәш қилиш ипадилирини билдүрүш һәрикити тәшкилләш билән биргә йәнә уйғур аптоном райониниң бир қисим юқири дәриҗилик назир дәриҗилик кадирлириниң ипадә хәтлириниму елан қилишқа киришти.

Һөкүмәт мәтбуат оргини һесаблинидиған "тәңритағ тори" уйғур аптоном районлуқ сучилиқ назарити партийә гурупписиниң секретари вә муавин назири илһам осман, уйғур аптоном районлуқ сода-санаәтчиләр идарисиниң башлиқи мәмәтҗан абла қатарлиқларниң уйғур кадирларға язған очуқ хәтлирини елан қилди.

Мәлум болушичә, йәнә ақсу вилайитиниң валийси мәрдан муқитму "ақсудики уйғур қериндашларға очуқ хәт" дәп аталған бир парчә хәтни елан қилған.

Аптоном районлуқ сода-санаәтчиләр идарисиниң башлиқи мәмәтҗан абла очуқ хетидә коммунистик партийәниң уйғур хәлқигә бәхтияр һаят елип кәлгәнликини көрситип, "биз уйғур миллити сәгәклик билән тонуп йетишимиз керәкки, бүгүнки бәхтияр һаятни худа әмәс, җуңго компартийәси бәргән" дәп язған вә уйғур кадирларни аталмиш "үч хил күч"ләргә қарши, "милли бөлгүнчиләр"гә қарши күрәш қилишқа чақирған.

Илһам осман болса, хетидә "шинҗаң әзәлдин улуғ вәтинимизниң айрилмас бир қисими, тарихтин бери көп милләт, көп дин вә көп мәдәнийәт өзара арилашқа вә учрашқан җай" дәп көрсәткән. У, обул қасим мәттурсунниң "шинҗаңдики һәр милләт кадирлири, болупму уйғур кадирлириниң йүрәк садасини аңлатқанлиқи", вә "һәр милләт хәлқиниң < уч хил күчләр>гә қәтий зәрбә бериш арзусини ипадилигәнлики"ни тәкитлигән.

Бу кадирларниң һәммиси хәтлиридә "икки йүзлимичилик"кә қарши туруш, партийәгә садиқ болуш ипадилирини билдүргән.

Көзәткүчиләрниң қаришичә, нөвәттә уйғур районида елип бериливатқан ипадә билдүрүш һәрикәтлиридә асасий нишан уйғур кадирларға вә уйғур аммисиға қаритилған болуп, аталмиш"милли бөлгүнчилик, әсәбийлик идийәси вә һәрикәтлири" пәқәт уйғурларғила хастәк кәйпият яритилмақта икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт