Bir qisim nazir derijilik kadirlar Uyghurlargha ochuq xet élan qildi

Muxbirimiz ümidwar
2017-04-09
Share


Uyghur aptonom rayoni da'iriliri xotenning kériye nahiyesi jay yéziliq partkomning mu'awin sékritari, yéza bashliqi obulqasim mettursun yazghan "Uyghur qérindashlargha xitab" namliq xetni tarqitip, Uyghur aptonom rayonining her qaysi wilayet, oblast, sheherlerdiki, bolupmu Uyghurlar bir qeder zich orunlashqan rayonlardiki rehbiriy kadirlar arisida "Üch xil küch"ke qarshi küresh qilish ipadilirini bildürüsh herikiti teshkillesh bilen birge yene Uyghur aptonom rayonining bir qisim yuqiri derijilik nazir derijilik kadirlirining ipade xetlirinimu élan qilishqa kirishti.

Hökümet metbu'at orgini hésablinidighan "Tengritagh tori" Uyghur aptonom rayonluq suchiliq nazariti partiye guruppisining sékrétari we mu'awin naziri ilham osman, Uyghur aptonom rayonluq soda-sana'etchiler idarisining bashliqi memetjan abla qatarliqlarning Uyghur kadirlargha yazghan ochuq xetlirini élan qildi.

Melum bolushiche, yene aqsu wilayitining waliysi merdan muqitmu "Aqsudiki Uyghur qérindashlargha ochuq xet" dep atalghan bir parche xetni élan qilghan.

Aptonom rayonluq soda-sana'etchiler idarisining bashliqi memetjan abla ochuq xétide kommunistik partiyening Uyghur xelqige bextiyar hayat élip kelgenlikini körsitip, "Biz Uyghur milliti segeklik bilen tonup yétishimiz kérekki, bügünki bextiyar hayatni xuda emes, junggo kompartiyesi bergen" dep yazghan we Uyghur kadirlarni atalmish "Üch xil küch"lerge qarshi, "Milli bölgünchiler"ge qarshi küresh qilishqa chaqirghan.

Ilham osman bolsa, xétide "Shinjang ezeldin ulugh wetinimizning ayrilmas bir qisimi, tarixtin béri köp millet, köp din we köp medeniyet öz'ara arilashqa we uchrashqan jay" dep körsetken. U, obul qasim mettursunning "Shinjangdiki her millet kadirliri, bolupmu Uyghur kadirlirining yürek sadasini anglatqanliqi", we "Her millet xelqining < uch xil küchler>ge qet'iy zerbe bérish arzusini ipadiligenliki"ni tekitligen.

Bu kadirlarning hemmisi xetliride "Ikki yüzlimichilik"ke qarshi turush, partiyege sadiq bolush ipadilirini bildürgen.

Közetküchilerning qarishiche, nöwette Uyghur rayonida élip bériliwatqan ipade bildürüsh heriketliride asasiy nishan Uyghur kadirlargha we Uyghur ammisigha qaritilghan bolup, atalmish"Milli bölgünchilik, esebiylik idiyesi we heriketliri" peqet Uyghurlarghila xastek keypiyat yaritilmaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet