Бу йил уйғур елидә йәнә 76 миң нәпәр кадир йеза-кәнтләргә әвәтилидикән

Мухбиримиз ирадә
2018.01.31

Уйғур район даирилири бу йил йәнә 12миң хизмәт әтрити вә 76 миң нәпәр кадирни асасий қатламға чүшүридикән. “шинҗаң гезити” ниң чаршәнбә күнидики хәвиридин қариғанда, уйғур район даирилири асасий қатламниң муқимлиқиға капаләтлик қилиш үчүн 2017-йилида “кәнттә турушлуқ кадирлар хизмәт әтрити” дегән нам билән төвәнгә чүшүрүлгән кадирлар қошуниниң 60 пирсәнтини давамлиқ йәнә кәнтләрдә елип қелишни вә йәнә йеңидин 40 пирсәнт кадирни төвәнгә чүшүрүшни қарар қилған икән. Қарарға асасән, 2018-йилиниң кириши билән йәнә 76 миң нәпәр кадир төвәнгә чүшүрүлүшкә башлиған, уларниң хизмәт муддитиму 3 йилға узартилған.

Мәзкур хәвәрдин ашкарилинишичә, уйғур район даирилири илгирикидин пәрқлиқ һалда кәнтләрниң партийә биринчи секретарлириниму үрүмчи бәлгилигән кадирлардин яки “биңтуән” вә яки хитай мәркизи һөкүмитиниң уйғур дияридики идарилириниң кадирлиридин бекитишкә башлиған. 

Чәтәлләрдики уйғур көзәткүчиләрниң қаришичә, юқиридики қарардин қариғанда уйғурлар зич олтурақлашқан җәнубий вилайәтләрдики кәнт секретарлириниң хитайлардин бекитилиши омумлишип, юқириси уйғур аптоном районлуқ партком секретаридин тартип, вилайәт, наһийә, йеза-кәнтләргичә болған пүтүн башқуруш системисида бир туташ хитай секретарлар һәммини қаттиқ башқуруш тори һасил қилинидикән. Инкаслардин мәлум болушичә, хитай компартийиси уйғур диярини игилигән 67 йилдин буян “партийә һәммигә йетәкчилик қилиду” дегән шоар билән һәр дәриҗилик партийә секретарлиқ һоқуқини пүтүнләй дегүдәк хитайларниң игилишини капаләткә игә қилип кәлмәктә иди. 

Нөвәттә, хитай һөкүмити уйғур елидики асасий қатламни чиң тутуш вә асасий қатлам кадирлирини башқурушни муқимлиқ яритиш вә күчәйтиштики һәл қилғуч амил сүпитидә чиң тутмақта. Улар бир қанчә йилидин буян зор сандики кадирларни йеза-кәнтләргә әвәтип, уларни өйму-кирип, партийә тәшвиқатини қилиш, әсәбийликкә қарши нутуқ сөзләш вә һәтта йезилардики “қош тил” йәслилирини башқуруш, хитай тили өгитиш қатарлиқ ишларға салмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.