Профессор җеймес милвард камбириҗ университети нәшриятиға очуқ хәт язди

Мухбиримиз қутлан
2017.08.20

Дуня илим саһәсидики әң даңлиқ университетларниң бири болған әнглийәдики камбириҗ университетиниң йеқинқи йиллардин буян хитайниң бесимиға дуч келиши вә өзи нәшр қиливатқан илмий журналлардики хитайға мунасивәтлик сәзгүр мақалиләрни чиқириветиши күчлүк инкас пәйда қилди.

Вашингтондики җорҗитавн университетиниң тарих пәнлири профессори, уйғур дияриниң йеқинқи заман тарихи бойичә даңлиқ мутәхәссис җеймес милвард бу мунасивәт билән 19-авғуст күни камбириҗ университети нәшриятиға язған очуқ хетини елан қилинған.

Мәзкур “очуқ хәт” тә алди билән камбириҗ университети нәшр қиливатқан “хитай пәсиллики” намлиқ журналниң хитайшунаслиқ бойичә дунядики әң нопузлуқ илмий журнал икәнлики тилға елинған. Андин камбириҗ университетиниң бейҗиң даирилириниң бесимиға баш егип, мәзкур журналдики 300 парчидәк хитайдики сәзгүр темиларға мунасивәтлик илмий мақалә билән баһаларни өчүрүвәткәнлики тәнқид қилинған. Ундин башқа йәнә камбириҗ университети нәшриятиниң хитайға мунасивәтлик 1000 дәк китабниң исмини өзиниң тор бетидики сетиш тизимликидин чиқиривәткәнлики илгири сүрүлгән.

Профессор җеймес милвард өзиниң очуқ хетидә йәнә хитай һөкүмитиниң йеқинқи йиллардин буян чәтәлләрдики илмий органлар, университетлар вә пән-тәтқиқат институтлириға қәдәр бесим ишлитип, тибәт вә уйғур мәсилиси, далай лама, лю шавбо, фалунгоң вә башқа хитайдики сәзгүр темиларға мунасивәтлик илмий әсәрләрниң йоруқ көрүшигә тосалғулуқ қилип кәлгәнликини илгири сүргән.

У ахирида, камбириҗ университети нәшриятиниң өзиниң узун тарих җәрянида шәкилләндүргән илмий нопузи билән хәлқарадики һөрмитини қоғдишини, хитайниң орунсиз тәләплиригә “яқ” дәп җаваб қайтурушини, иқтисадий нәп үчүн өзиниң дуняви шөһрити вә илим саһәсидики гигант образини қурбан қилмаслиқини тәвсийә қилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.