4-Féwral kanadadiki bir qanche sheherde namayish ötküzülüp, béyjing qishliq olimpikige naraziliq bildürüldi

4-Féwral küni béyjing qishliq olimpikining échilish murasimi béyjingda ötküzüliwatqan waqitta, Uyghurlar kanadaning toronto, ottawa, wankowér, kalgari qatarliq sheherliride tibetler, xongkongluqlar we bashqa teshkilatlar bilen birliship, béyjing qishliq olimpikige qarshi naraziliq namayishi ‍ötküzgen.

Kanadadiki bu namayishlar dunyaning nurghun sheherliride shu küni yaki shuningdin bir kün awwal ötküzülgen béyjing qishliq olimpikige qarshi bir qatar namayishlarning bir qismidur. Torontodiki namayish kanada olimpik komitétining aldidin bashlinip, andin namayishchilar xitayning torontodiki konsulxanisigha piyade yürüsh qilghan.

Bu namayishni teshkilligen “Kanada sherqiy türkistan jem'iyiti” ning re'isi tuyghun abduweli: “Bügün béyjingdiki qan'gha boyalghan rezil bir olimpikning échilishigha qarshi kanada olimpik komitéti aldigha toplanduq,” dédi.

Ottawadiki namayishmu “Kanada sherqiy türkistan jem'iyiti”, “Uyghur heqlirini qoghdash qurulushi”, shundaqla tibetler, xongkongluqlar, falun'gongchilar, yehudilar we bashqa kishilik hoquq teshkilatlirining hemkarliqida élip bérilghan bolup, xitayning kanadada turushluq bash elchixanisi aldida ötküzülgen.

Namayishta yash pa'aliyetchi kewser kamil Uyghurlargha wakaleten söz qilip, gerche özi kanadagha kichik waqtida kelgen bolsimu, biraq xitayning Uyghurlargha qilghan irqiy qirghinchiliqini kichik chéghidin bashlap hés qilip kelgenliki, Uyghurlar üchün ata-ana we uruq-tughqanlirini esleshmu azabliq bir ishqa aylinip qalghanliqi, kanada hökümiti we xelqini Uyghurlargha yardem qilishqa chaqiridighanliqini bildürgen. Béyjing qishliq olimpikining échilish murasimi 1997-yildiki “5-Féwral ghulja qirghinchiliqi” ning 25 yilliq xatire künige toghra kelgen.

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar