Канадалиқ мутәхәссис: «вәзиписидин чәтнигән хитай дипломатлар чеградин чиқирилиши керәк»

Мухбиримиз шөһрәт һошур
2018-02-14
Елхәт
Пикир
Share
Принт

Канадалиқ мутәхәссис чарлес бартон бүгүн мақал елан қилип, канаданиң хитайға қаратқан сияситидә вә икки дөләт мунасивитидики мәсилиләрдә һошярлиқни өстүрүшкә чақирди.

Хитайниң иқтисадий тәрәққий қилғансери өзиниң қиммәт қарашлирини дуняға теңишқа башлиғанлиқи илгири сүрүлгән мәзкур мақалида канададики сиясий партийәләрниң чәтәлләрдин кәлгән ианә пуллирини қобул қилмаслиқи, пенсийәгә чиққан сиясийонларниң хитай билән болған илгирики хизмәт мунасивити торидин пайдилинип тиҗарәт қилишиниң алди елиниши қатарлиқ мәсилиләр алаһидә тәкитләнгән.

Мақалида хитай дипломатлириниң вәзипә вә һоқуқ даирисидин чәтнигәнлики тилға елинип, мундақ дейилгән: «канададики хитай дипломатлири канадада яшаватқан хитай демократлар, тибәтликләр вә уйғурларға һәр хил шәкилдә тәһдит салмақта. Бундақ һәддини билмигән дипломатларниң визиси узартилмаслиқи керәк, һәтта мөрити кәлгәндә уларни чеградин қоғлап чиқириш керәк.»

Мәзкур мақалида ғәрб дөләтлиридики көплигән тәтқиқат орунлири хитайниң сиңип кириши мәсилиси бойичә агаһландурулған. Мақалида йәнә канадаға сахта қияпәт билән киргән хитай җасуслирини байқаш вә җазалишиниңму зөрүрлүки әскәртилгән. Канадада һәр вақит хитайни ақлайдиған яки яқлайдиған сиясийонларниң учрап туридиғанлиқи тилға елинған бу мақалида, уларниң хитай билән болған шәхсий мәнпәәт мунасивәтлириниң көздин көчүрүлүши тәвсийә қилинған. Мақалида канада даирилиниң тибәт роһаний даһийси далай лама билән болған көрүшүшни давамлаштуруши керәклики оттуриға қоюлған.

Мақалә аптори чарлес буртон канададики брок университетиниң дотсенти болуп, у илгири канаданиң бейҗиңдики әлчиханисида мәслиһәтчилик вәзиписини өтигән икән.

Пикирләр (0)
Share
Толуқ бәт