Kanadaliq mutexessis: "Wezipisidin chetnigen xitay diplomatlar chégradin chiqirilishi kérek"

Muxbirimiz shöhret hoshur
2018-02-14
Share

Kanadaliq mutexessis charlés barton bügün maqal élan qilip, kanadaning xitaygha qaratqan siyasitide we ikki dölet munasiwitidiki mesililerde hoshyarliqni östürüshke chaqirdi.

Xitayning iqtisadiy tereqqiy qilghanséri özining qimmet qarashlirini dunyagha téngishqa bashlighanliqi ilgiri sürülgen mezkur maqalida kanadadiki siyasiy partiyelerning chet'ellerdin kelgen i'ane pullirini qobul qilmasliqi, pénsiyege chiqqan siyasiyonlarning xitay bilen bolghan ilgiriki xizmet munasiwiti toridin paydilinip tijaret qilishining aldi élinishi qatarliq mesililer alahide tekitlen'gen.

Maqalida xitay diplomatlirining wezipe we hoquq da'irisidin chetnigenliki tilgha élinip, mundaq déyilgen: "Kanadadiki xitay diplomatliri kanadada yashawatqan xitay démokratlar, tibetlikler we Uyghurlargha her xil shekilde tehdit salmaqta. Bundaq heddini bilmigen diplomatlarning wizisi uzartilmasliqi kérek, hetta möriti kelgende ularni chégradin qoghlap chiqirish kérek."

Mezkur maqalida gherb döletliridiki köpligen tetqiqat orunliri xitayning singip kirishi mesilisi boyiche agahlandurulghan. Maqalida yene kanadagha saxta qiyapet bilen kirgen xitay jasuslirini bayqash we jazalishiningmu zörürlüki eskertilgen. Kanadada her waqit xitayni aqlaydighan yaki yaqlaydighan siyasiyonlarning uchrap turidighanliqi tilgha élin'ghan bu maqalida, ularning xitay bilen bolghan shexsiy menpe'et munasiwetlirining közdin köchürülüshi tewsiye qilin'ghan. Maqalida kanada da'irilining tibet rohaniy dahiysi dalay lama bilen bolghan körüshüshni dawamlashturushi kérekliki otturigha qoyulghan.

Maqale aptori charlés burton kanadadiki brok uniwérsitétining dotsénti bolup, u ilgiri kanadaning béyjingdiki elchixanisida meslihetchilik wezipisini ötigen iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet