Хитай канаданиң тутқундики канада пуқралирини қоюп бериш чақириқини рәт қилди

Мухбиримиз әркин
2018-12-24
Елхәт
Пикир
Share
Принт

Хитай һөкүмити 24‏-декабир канаданиң хитайда тутқун қилинған канада пуқралирини қоюп бериш тәлипини рәт қилип, канаданиң хуавей техника ширкитиниң юқири дәриҗилик мәсули миң вәнҗони қоюп беришни тәләп қилған.

Буниң алдида канада ташқи ишлар министири кристя фреланд бейҗиң даирилирини хитайда тутқун қилинған 2 нәпәр канада пуқрасини қоюп беришкә, иттипақдаш дөләтләрни буниңға ярдәм қилишқа чақирған иди. Кристия фреланд өткән шәнбә күни елан қилған чақириқида хитайниң 2 нәпәр канада пуқрасини тутқун қилиши пүткүл хәлқара җәмийәткә яман үлгә яритип беридиғанлиқини тәкитлигән. У йәнә канаданиң хәлқара келишимләргә хусусән америка билән имзалиған җинайәт гумандарлирини өткүзүп бериш келишимигә әмәл қилидиғанлиқини әскәртип, миң вәнҗо вәқәсидә қанун-бәлгилимә вә сот ишлирида мурәссә қилмайдиғанлиқи, бу делони сиясийлаштурмайдиғанлиқини билдүргән.

Канада бу йил 1‏-декабир күни америкиниң тәлипигә бинаән хуавей ширкитиниң баш боғалтири вә муавин мудири миң вәнҗони қолға алған. Арқидинла хитай һөкүмити хитайда турушлуқ икки канада пуқрасини тутқун қилған. Буниңға қарита кристия фреланд баянат елан қилип, уларни қоюп беришни тәләп қилған. Униңдин сирт америкиму хитайдин канада пуқралирини қоюп беришни тәләп қилған иди. Лекин японийә NHK ниң хәвәр қилишичә, хитай ташқи ишлар министирлиқиниң баянатчиси хуа чүнйиң дүшәнбә күнлүк ахбарат йиғинида америка билән канададин хитайниң әдлийә игилик һоқуқиға һөрмәт қилишни тәләп қилған. У йәнә канаданиң «хаталиқини түзитип, миң вәнҗо дәрһал қоюп бериш» кә, америкиниң миң вәнҗони тутуш буйруқини әмәлдин қалдурушқа чақирған.

Һалбуки, америка әдлийә органлири миң вәнҗуни америкиниң експорт қануниға хилаплиқ қилиш билән әйиблимәктә. Көзәткүчиләрниң илгири сүрүшичә, хитайниң икки нәпәр канада пуқрасини тутқун қилиши миң вәнҗониң қолға елинишиға қарита өч елишни мәқсәт қилған икән.

Пикирләр (0)
Share
Толуқ бәт