Kanada xitay bilen bolghan munasiwitidiki jiddiychilikni ongshash üchün heriket qilishqa bashlighan

Washin'gtondin muxbirimiz uyghar teyyarlidi
2024.04.17

Yéqindin buyan kanada hökümiti xitay bilen barghanséri jiddiyliship kétiwatqan munasiwetlirini ongshash, shundaqla ikki dölet otturisidiki soda we iqtisadiy tertiplerni normallashturush üchün heriket qilishqa bashlighan.

“Firansiye agéntliqi”ning 15-apréldiki xewirige qarighanda, kanada tashqi ishlar ministiri mélani joli (Melanie Joly) xitay hökümiti bilen dawam qiliwatqan soghuq munasiwetni yaxshilash, yeni “Xitay bilen bolghan ikki tereplik munasiwetni normallashturush” üchün, mu'awin tashqi ishlar ministiri dawid morrison (David Morrison) ni xitaygha ewetidiken.

Yéqindin buyan béyjing bilen ottawa otturisidiki munasiwet her jehettin jiddiyleshken idi. Bolupmu 2018-yili kanada saqchilirining wankowér xelq'ara ayrodurumida “Xu'awéy” ning ijra'iye emeldari méng wenjowni qolgha élishi؛ xitayning buninggha öch élish xaraktérlik inkas qayturup ikki neper kanadaliqni “Jasusluq” jinayiti bilen eyiblep türmige tashlishi  netijiside kanada bilen xitayning munasiwiti nacharlishishqa qarap yüzlen'gen idi. Uning üstige, xitayning 2019-we 2021-yilliridiki kanada saylimigha arilashqanliqi toghrisidiki detalashlar, ikki dölet arisidiki munasiwetning téximu jiddiylishishige seweb bolghan idi.

Ötken yili kanada hökümiti kanadada turushluq bir neper xitay diplomatini “Xitay kompartiyesige qarshi tenqid bilen tonulghan bir neper kanada parlamént ezasini zerbe bérish nishani qilghan” dep eyibligen we uni kanadadin qoghlap chiqarghan idi. Yéqinqi yillardin buyan, kanada terep yene xitayning xongkong démokratiyesini tunjuqturush heriketliri bilen Uyghurlargha qaratqan yuqiri bésimliq basturushlirini melum shekillerde tenqid qilghan idi.

Mezkur xewerde ikki terepning soda sahesidiki munasiwetlirini eslige keltürüsh we normallashturush mesiliside, hem kanada hem xitay üchün bésimining barghanséri küchiyiwatqanliqi ilgiri sürülgen. Igilinishiche, yéqin kelgüside amérika tashqi ishlar ministiri antoniy bilinkénmu xitayni ziyaret qilidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.