Канада һөкүмитиниң 10 миң уйғур мусапирни қобул қилиши һәққидики чақириқлар күчәймәктә

Мухбиримиз әзиз
2022.06.21
Share on WhatsApp
Share on WhatsApp

Канада һөкүмитиниң қайтар макани болмиған 10 миң уйғурға панаһлиқ бериши һәққидики чақириқлар йеқиндин буян канада парламентида тәкитлинишкә башлиди.

Канада чиқидиған “йәршари почтиси” гезитиниң 19-июндики хәвиридә ейтилишичә, канада авам палатасиниң әзаси, “хәлқара кишилик һоқуқ комитети” ниң рәиси сәмир зубәйри (Sameer Zuberi) йеқинда тәклип лайиһәси сунуп, канада һөкүмитидин үчинчи бир дөләттә мусапир болуп яшаватқан, шундақла хитай һөкүмитиниң түрлүк зиянкәшликлири түпәйлидин қайтарға һечқандақ макани қалмиған 10 миң уйғур вә башқа түркий тиллиқ қачқунға панаһлиқ беришни тәләп қилған.

Хәвәрдә ейтилишичә, канада парламенти йеқин кәлгүсидә бу лайиһәни музакиригә қойидиған болуп, сәмир зубәйри бу һәқтә мухбирларға сөз қилғанда “мән кейинки бирнәччә айда мушу қанун лайиһәсиниң мақуллиниши һәмдә иҗра қилиниши үчүн паал һәрикәт қилимән” дегән. Униң ейтишичә, униң бу қанун лайиһәсини оттуриға қоюшиға канада парламентиниң 2021-йили хитай һөкүмитиниң уйғурларға тутқан муамилисини “ирқий қирғинчилиқ” дәп қарар елиши түрткә болғаникән. Шу вақиттила канада көчмәнләр министирликигә “2024-йилидин башлап 10 миң уйғур вә башқа түркий тиллиқ мусулманларға панаһлиқ макани бериш” тәклипи сунулғаникән. Канададики уйғур паалийәтчиләрдин мәмәт тохти бу һәқтә сөз қилип: “муһаҗирәттики уйғур мусапирлири хитай һөкүмитиниң зулумлирини әң көп паш қиливатқанлардин болғачқа хитай һөкүмити һәрқачан уларни қайтуруп кетишкә урунуп келиватиду. Бу болса ашу муһаҗирлар үчүн еғир тәһдитләрни пәйда қилмақта” дегән.

Хәвәрдә ейтилишичә, канада һөкүмити йеқиндин буян афғанистан мусапирлири вә украина мусапирлириға панаһлиқ бериш ишлири билән алдираш болуватқан болуп, уйғур мусапирлири тоғрисида техичә ениқ бир қарар алмиғаникән. Навада бу лайиһә мақулланса он миң уйғур түркүмләргә бөлүнүп канадаға йәрләштүрүлүши мумкин икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт