Канада һөкүмити уйғурларни мәҗбурий әмгәккә селишқа қарши тәдбир көрүшкә чақирилмақта

Мухбиримиз әзиз
2020-07-28
Елхәт
Пикир
Share
Принт

Хитай һөкүмитиниң уйғурларни бастуруш арқилиқ дуня аллиқачан унтуп кәткән «заманиви қуллуқ әмгики» ни бәрпа қилиши йеқиндин буян күчлүк тәнқидләргә дуч келишкә башлиди. Шу қатарда канада һөкүмитиму бу мәсилини җиддий мәсилиләр қатарида музакирә қилишқа өтти. Канададики әң чоң сиясий гезитләрдин болған «мәклин» гезитидә 27-июл елан қилинған мақалида мушу әһваллар тонуштурулди.

Мақалида көрситилишичә, хитайдики бир қисим тәминат зәнҗири канада базирини изчил тәминләп келиватқан мәнбәләрдин бири болуп, йеқиндин буян уларниң уйғурларни мәҗбурий әмгәккә селишқа четилидиғанлиқи һәққидә көплигән испатлар мәлум болушқа башлиған. Канада парламентиға қарашлиқ аммиви бихәтәрлик вә дөләт бихәтәрлики комитетиниң рәиси җон мәккай бу һәқтә сөз қилип «биз бир қәбиһликни көрүп туруп буниңға көз юмидиған бир дөләткә айлинип қалсақ болмайду» дегән.

Йеқинқи икки йилдин буян мәккай канада парламентини «заманиви қуллуқни чәкләш қануни» ни мақуллашқа чақирип келиватқан болуп, бу қанун лайиһәсидә мәҗбурий әмгәкни өз ичигә алған ишләпчиқиришни вә униңдин һасил болған мәһсулатларни чәкләш һәққидә системилиқ бәлгилимиләр бар икән. Әмма йеқинқи мәзгилләрдә канада һөкүмити өзлириниң хитай билән болған икки милярд долларлиқ «вирусқа қарши туруш мәһсулатлири» содисиниң уйғурлар дияридики мәҗбурий әмгәк билән қайси дәриҗидә четишлиқ икәнликигә қарап чиқишқа дәвәт қилинмақтикән. Чүнки бу мәһсулатларға лазимлиқ пахтиларниң мутләқ көп қисми уйғурлар дияридин келидиған болуп, буниңда көплигән гуманлиқ нуқтилар бар икән.

Пикирләр (0)
Share
Толуқ бәт