Канада баш министири уйғурлар мәсилисидә хитайниң тәһдитлиригә тиз пүкмәйдиғанлиқини билдүргән

Мухбиримиз әркин
2020-10-16
Елхәт
Пикир
Share
Принт

Канада баш министири җастин терудо 16-өктәбир йәнә уйғур мәсилисини тилға елип, хитайниң «зорлаш дипломатийәси» вә униң хоңкоң һәм шинҗаңдики кишилик һоқуқ дәпсәндичиликлиригә давамлиқ қарши туридиғанлиқини билдүргән. Терудо бу сөзләрни хитайниң канадада турушлуқ әлчиси соң пейву 15-өктәбир видейода ахбарат йиғини өткүзүп, канада парламент әзалирини хитайниң уйғурларға тутқан муамилисини «ирқий қирғинчлиқ» дәп етирап қилиштин еһтият қилишқа агаһландурғандин кейин қилған.

Соң пейву ахбарат йиғинида «бизниң мәнпәәтимизгә, болупму ядролуқ мәнпәәтимизгә зиян йәркүзүдиған һәрқандақ һәрикәт күчлүк инкасқа учрайду» дегән. У йәнә хитайниң «қәтий тәдбир қоллинип, өзиниң игилик һоқуқи, дөләт бихәтәрлики вә тәрәққият һоқуқини қоғдайдиғанлиқи» ни илгири сүргән. Лекин у әгәр канада хитайниң уйғурларға тутқан муамилисини «ирқий қирғинчилиқ» дәп етирап қилса, қандақ тәдбир қоллинидиғанлиқини тилға алмиған.

Йеқинда канада парламентиниң 9 нәпәр әзаси тәләпнамә сунуп, хитайниң уйғурларға тутқан муамилисини «ирқий қирғинчлиқ» дәп етирап қилишни тәләп қилған иди. Ройтерс агентлиқиниң хәвәр қилишичә, җастин терудо 16-өктәбир чақирған ахбарат йиғинида мундақ дегән: «биз дуняниң һәр қайси җайлиридики кишилик һоқуқ үчүн ениқ вә юқири авазда тик туримиз. Мәйли бу уйғурлар дуч келиватқан вәзийәт болсун, мәйли хокоң вәзийити болсун яки бу хитайниң ‹зорлаш дипломатийәси' болсун.»

Пикирләр (0)
Share
Толуқ бәт