Йүзлигән амма канаданиң ванковер шәһридә намайиш қилип, хитайниң уйғурларни йоқитишиға наразилиқ билдүрди

Мухбиримиз әркин
2020-10-19
Елхәт
Пикир
Share
Принт

18-Өктәбир күни йүзлигән амма канаданиң ванковер шәһридә намайиш қилип, хитайниң уйғурларға тутқан вәһши муамилисигә наразлиқ билдүргән. Қолида «3 милйон уйғур тутқун лагерлиридин қоюп берилсун», «хитайни байқут қилайли» дегән лозункиларни көтүргән намайишчилар ванкувер сәнәт көргәзмисиниң алдида топлунуп, бу йәрдин хитай консулханисиға йүрүш қилған. «Һиндистан блумиз» намлиқ тор гезитиниң хәвәр қилишичә, бу намайиш ванковердики «канада-һиндистан достлири» тәшкилатиниң башчилиқида тибәт, демократик хитай вә уйғур җәмийәтлири вә җамаәтлири тәрипидин уюштурулғаникән.

Бу мәзкур тәшкилатларниң йеқинқи бир ай ичидә ванковерда хитайға қарши 2-қетим бу хил намайишни уюштурушидур. Намайишчилар хитай консулханисиниң алдида униң 3 милйондәк уйғурни лагерларға қамиғанлиқини әйиплигән. «Канада-һиндистан достлири» тәшкилатиниң мәсули маниндер гил сөзидә хитайниң ахбарат әркинлики, сөз әркинлики вә йиғилиш әркинликигә тәһдит селиватқанлиқини билдүрүп, «хитайниң мәсулийәтсиз вә диктаторлуқ қилмиши» ни қаттиқ тәнқид қилған.

Бу намайиш канада баш министири җастин терудо өткән һәптә хитайниң кишилик һоқуқ мәсилилиридики тәһдит вә «мәҗбурлаш дипломатийәси» гә тез пүкмәйдиғанлиқини тәкитләп арқидинла өткүзүлгән. Терудо созидә канаданиң уйғур вә хоңкоң мәсилилирини давамлиқ тилға алидиғанлиқини билдүргән. «Канада-һиндистан достлири» тәшкилати өткән айдиму хитайниң ванковердики консулханиси алдида намайиш өткүзүп, хитайниң кишилик һоқуқ хатириси вә униң хоңкогн намайишчилирини бастурғанлиқини, һиндистанға тәһдит селиватқналиқини әйиблигәниди.

Пикирләр (0)
Share
Толуқ бәт