Pakistanning karachi shehiride yüz bergen partlash xitay puqralirini nishan qilghan

Muxbirimiz erkin
2016.05.30

Düshenbe küni pakistanning karachi shehiri gülsheni- hadéd rayonida bomba partlap, bir xitay inzhénér bilen uning shopuri yarilan'ghan. Karachi saqchi da'irilirining b b s gha bildürüshiche, tizgineklik bomba xitay puqralirini nishan qilghan.

Pakistan axbarati, xitay inzhénérning gulsheni-hadéd rayonida olturidighanliqini, uning aptomobiligha héchqandaq qoghdash tedbiri élinmighanliqini ilgiri sürgen.

Partlashning jawabkarliqini hazirgha qeder héchkim üstige almidi. Emma karachi saqchi idarisining emeldari ra'o enwerning bildürüshiche, partlash yüz bergen meydandin sindi tilida yézilghan “Chet'ellikler sindining tebi'iy bayliqini kontrol qiliwélip baridu” dégen bir teshwiqat wereqisi tépilghan.

Pakistan bash ministiri nawaz sherip ilgiri sherqiy türkistan islam herikiti we uning qollighuchilirigha qarshi aktip küresh qilidighanliqini, barliq tedbirlerni qollinip, pakistandiki xitay puqralirini we shirketlirini qoghdaydighanliqini bildürgen. Nawaz shérip hökümiti yéqinda bixeterlikni bahane qilip, pakistan parlaméntigha pakistandiki xitay puqralirining sanini ashkarilashni ret qilghan idi.

Pakistan axbaratining qeyt qilishiche, hazir nechche yüzligen xitay puqrasi qeshqer-gwadar karidori we pakistanning bashqa qurulush türliride ishleydiken. Pakistan hökümiti ilgiri qeshqer-gwadar karidor qurulushini qoghdashqa 13 ming kishilik amanliq qismi teshkilligen. Da'iriler sindi ölkisidiki xitaylar meblegh salghan 111 xil qurulush türide ishlewatqan 1500 neper qoshna el puqrasini qoghdashqa amanliq xadimlirini ajratqanliqini bildürgen.

B b s ning qeyt qilishiche, sindi ölkisining 1‏-ministiri qayim ali shah we bash teptishi xawaja partlashni tekshürüshke buyruq bergen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.