Karizlarning qurushqa yüzlinishi Uyghur medeniyitidiki bir zor yoqitishtin bésharet bermekte

Xitay yillardin buyan “Yer asti seddichin sépili” dep atawatqan turpan karizlirining yéqindin buyan qurup kétishke yüz tutushi uzaq bolmighan kelgüside Uyghur maddiy medeniyitidiki bir katta mirasning ghayib bolidighanliqidin dérek bermekte.

“Yer shari we pochta” gézitining 20-öktebir sanigha mezkur gézitning muxbiri nasan wandérklip turpandiki emeliy tekshürüsh asasida yézip chiqqan bu heqtiki mulahize maqalisi bésilghan. Aptor maqaliside: “Nöwette 4400 kilométir uzunluqtiki turpan karizlirining aran töttin biride su éqiwatidu,” dep yazghan. Emma irandiki karizlarning bolsa nöwette töttin üch qismida izchil su aqmaqta iken. Uning pikriche, rayon miqyasida zamaniwi pen-téxnikining köplep tetbiqlinishi karizlarning qurup kétishke yüzlinishidiki bir muhim seweb iken.

Muxbir karizlarning hazirqi xeterlik ehwali heqqide yerlik Uyghurlarni ziyaret qilghanda ular “Biz Uyghur bolghachqa bu toghriliq sözliyelmeymiz. Bolmisa bizni (hökümet) birdemdila baridighan yerge apirip qoyidu,” dégen.