Хәлқара кәчүрүм тәшкилати президент макронни уйғур мәсилисидә ши җинпиңға бесим ишлитишкә чақирди

Мухбиримиз әркин
2019-03-22
Елхәт
Пикир
Share
Принт

Хәлқара кәчүрүм тәшкилатиниң директори кеннис рот фирансийә президенти емануел макронға мәктуп йезип, макронни фирансийәдә зиярәттә болидиған хитай рәиси ши җинпиңға уйғур районида тәкшүрүш елип беришқа йол қоюш, тутқунларни қоюп бериш қатарлиқ мәсилиләрдә бесим ишлитишкә чақирған.

Мәктубта президент макронниң хитайниң кишилик һоқуқ дәпсәндичиликини «йошурмаслиқи» һәққидә бәргән вәдисигә әмәл қилиши тәләп қилинған. Хәлқара кәчүрүм тәшкилатиниң билдүрүшичә, ши җинпиң 24‏-марттин 26‏-мартқичә фирансийәдә зиярәттә болидикән. У 22‏-март күни италийәгә йетип кәлгән. Мәзкур мәктуп 22‏-март күни хәлқара кәчүрүм тәшкилатиниң торида елан қилинди.

Кеннис рот мәктубта «хитай рәиси ши җинпиңниң фирансийә зиярити президент макронниң шинҗаңда җазалашқа учраватқан түркий мусулманлириниң әһвали һәққидә ишәнчлик хәлқара тәкшүрүш елип беришни тәләп қилиши үчүн муһим пурсәт» дегән. Кеннис ротниң илгири сүрүшичә, «макрон хитайда нәччә он йиллардин бери көрүлүп бақмиған кишилик һоқуқ дәпсәндичилики тоғрисида ши җинпиңға риқабәт елан қилип, әркинлик, адаләт мәсилилиридәк өзи тәшәббус қилип кәлгән ‹ортақ қиммәт қарашлири' ни намаян қилиши керәк» икән. Мәктубта макронниң ши җинпиң билән көрүшкәндә б д т ниң уйғур районида тәкшүрүш елип беришиға йол қоюш, гуй миңхәй, хуаң чи, илһам тохти, таши ваңчук, гүлмирә имин қатарлиқ тутқунларни қоюп бериш қатарлиқ тәләпләрдә болуши тәкитләнгән.

Ши җинпиң хитай һөкүмити 800 миңдин 2 милйонғичә уйғур, қазақ вә башқа йәрлик мусулман милләтләрни лагерларға қамап, хәлқараниң қаттиқ тәнқидигә учраватқан бир вақитта явропада зиярәттә болди.

Пикирләр (0)
Share
Толуқ бәт