Xelq'ara kechürüm teshkilati xitayning "Bixeterlik" namida kishilik hoquqni depsende qiliwatqanliqini eyiblidi

Muxbirimiz eziz
2018-06-01
Élxet
Pikir
Share
Print

Xelq'ara kechürüm teshkilati bügün mexsus doklat élan qilip, xitay hökümitining yillardin buyan özlirining basturush heriketlirini "Dölet bixeterliki" dégen namda yolluq qilip körsitishke urunuwatqanliqini eyiblidi.

Doklatta körsitilishiche, xitay kishilik hoquqni qoghdashqa munasiwetlik bir qatar xelq'araliq ehdinamilerge qol qoyghan bolup, birleshken döletler teshkilati (b d t) ning kishilik hoquq xizmitige aktip maslishidighanliqi heqqide wede bergen. Emma xitay izchil halda "Dölet bixeterlikini qoghdash yolidiki zörür tedbirlerni ijra qiliwatimiz," dégen bahanide puqralarni parakende qilish, xalighanche qolgha élish, tehdit sélish, türmige qamash, naheq sotlash, az sanliq milletlerge qarita kemsitish xaraktéridiki siyasetlerni köplep ijra qilish qatarliq wasitiler arqiliq kishilik hoquqni éghir derijide depsende qilip kelmekte iken.

Doklatta éniq qilip xitay hökümitining izchil halda ölüm jazasini bikar qilish heqqidiki munasiwetlik tekliplerni ret qilip kelgenliki, bolupmu xitayda "Az sanliq millet" dep qariliwatqan Uyghurlarning xitay hökümiti ijra qiliwatqan "Bölgünchilikke qarshi turush" we "Térrorluqqa qarshi turush" kürishining asasliq nishani bolghanliqi éytilidu. Uningda bayan qilinishiche, Uyghur diyaridiki hökümet organliri yene öz aldigha térrorluqqa we esebiylikke qarshi turush nizamlirini maqullap, özlirining Uyghurlarni basturushini qanunlashturuwalghan.

Doklatta yene 2017-yilidin bashlap xitay hökümitining Uyghurlarni tarixta misli körülmigen derijide basturushni bashlighanliqi, buningliq bilenla qalmay chet'ellerdiki Uyghur oqughuchilarnimu qaytip kélishke buyruq qilip, kelgenlirini udulluq qolgha alghanliqi, bu ehwalning misirdiki Uyghur oqughuchilarni qayturup kélishte eng gewdilik bolghanliqi tilgha élinidu.

Melum bolushiche bu doklat birleshken döletler teshkilati (b d t) ning 2018-yili noyabir éyida échilmaqchi bolghan uniwérsal qerellik bahalash yighinigha teyyarlan'ghan bolup, bu yighinda xelq'ara kechürüm teshkilati özlirining bir qatar teklip we tewsiyelirini otturigha qoyidiken.

Toluq bet