Xelq'ara kechürüm teshkilati: “Zulyar yasin xitay hökümiti dawam qiliwatqan zor kölemlik tutqunning qurbanliridin biri”

Muxbirimiz eziz
2022.06.28
Share on WhatsApp
Share on WhatsApp

2021-Yili dékabirda ürümchide qolgha élin'ghan zulyar yasin eslide xitaydiki fujyen uniwérsitétining oqughuchisi bolup, ürümchige praktika qilish üchün kelgende “Bölgünchilik” bilen eyiblinip qolgha élin'ghan. Zulyarning “Jinayetliri” heqqidiki sot 28-iyun küni échilidighanliqi melum bolghandin kéyin xelq'ara kechürüm teshkilati bu heqte bayanat élan qildi.

Xelq'ara kechürüm teshkilatining tor bétide élan qilin'ghan bayanatida éytilishiche, bu yil 25 yashqa kirgen zulyar yasin 2014-yili türkiyege oqushqa bérip istanbul uniwérsitétida ikki yil oqughaniken. Nöwette bu uning “Wetenni parchilash” jinayitining ispatigha aylinip qalghan. Uning yawropadiki hammisi bu heqte söz qilip “Zulyarning ‛jinayiti‚ heqqide héchqandaq delil-ispat yoq. Xitay hökümiti hazir mushundaq yalghan ‛jinayet‚lerni yasap chiqip Uyghurlarni basturmaqta” dégen.

Xelq'ara kechürüm teshkilati xitay ishliri bölümining mes'uli gwén li (Gwen Lee) bu heqte söz qilip, zulyarning qismiti nöwette Uyghur diyarida dawam qiliwatqan basturushning eng addiy misalliridin biri ikenlikini bildürgen. U bu heqte muxbirlargha söz qilip: “Zulyar yasin xitay hökümiti dawam qiliwatqan zor kölemlik tutqunning eng axirqi qurbanliridin biri. Uyghurlarning türmige yaki lagérgha qamilishi, qiynaqqa we ziyankeshlikke uchrishi birdek qanunsizdur” dégen.

Melum bolushiche, xitayning sabiq jama'et xewpsizlik ministiri jaw kéji 2016-yili iyunda “Ichkiride oquwatqan Uyghur oqughuchilar ongayla diniy ashqunluqning zeherlishige uchrap térrorluqqa ariliship qalidu. Ularni qattiq kontrol qilish kérek” dep yolyoruq bergeniken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.