Хәлқара кәчүрүм тәшкилати рабийә қадир ханимниң тутқундики аилә әзалириниң қоюп берилишни тәләп қилди

Хәлқара кәчүрүм тәшкилати өткән һәптә имза қоюш һәрикити қозғап, уйғур кишилик һоқуқ рәһбири рабийә қадир ханимниң тутқундики аилә әзалириниң қоюп берилишини тәләп қилиш һәрикити башлиған.

Хәлқара кәчүрүм тәшкилатиниң чақириқида, униң пәрзәнтлири, нәврилири вә қериндашлиридин 30 дәк кишиниң 2017‏-йилдин бери һечқандақ қануни рәсмийәтсиз тутуп турулуватқанлиқи тәкитләнгән. Униңда кишиләрниң бу чақириқнамиға дәрһал имза қоюп, хитай рәиси ши җинпиңға әвәтиши тәләп қилинған.

Чақириқнамидә, әгәр уларниң хәлқара бирдәк етирап қилған бирәр хаталиқ садир қилғанлиқиға даир ишәнчлик һәм қайил қиларлиқ дәлилләр болмиса, тутқундики барлиқ аилә әзалирини шәртсиз вә дәрһал қоюп берилиши тәләп қилинған. Хәлқара кәчүрүм тәшкилатиниң илгири сүрүшичә, хитай дарилири рабийә қадир ханимниң оғуллири-абликим абдуреһим, қаһар абдуреһим, алим абдуреһим уларниң аяллири, пәрзәнтлири, рабийә қадир ханимниң һәдә-сиңиллири вә инилирини өз ичигә алған 30 аилә әзаси икки йилдин бери уйғур аптоном районидики мәлум бир тутуп туруш мәркизидә тутуп турулмақтикән. Чақириқнамидә, “радикаллиқни түгитиш мәркәзлири”, “сиясий өгиниш мәркәзлири” яки “тәрбийәләш арқилиқ өзгәртиш мәркәзлири” дегән намлардики бу хил тутуп туруш орунлириниң пүткүл аптоном район миқясида қурулғанлиқи, бу орунларниң уйғур вә башқа мусулманларни халиғанчә тутқун қилип, муддәтсиз тутуп туруш билән тонулғанлиқи тәкитләнгән.

Чақириқнамидә йәнә, рабийә қадир ханимниң аилә әзалириниң аилиси билән қәрәллик вә тосқунлуқсиз көрүшүп туруши, халиған адвокатни тәклип қилишиға, тән җазаси вә қопал муамилигә учримаслиқиға капаләтлик қилиниши тәләп қилинған. Рабийә қадир ханим 2005‏-йили америкиға давалинишқа қоюп берилгәндин бери, униң аилә әзалири вә уруқ-туғқанлири изчил хитай һөкүмитиниң паракәндичиликигә учрап кәлгәниди.