Xelq'ara kechürüm teshkilati rabiye qadir xanimning tutqundiki a'ile ezalirining qoyup bérilishni telep qildi

Muxbirimiz erkin
2019-07-19
Élxet
Pikir
Share
Print

Xelq'ara kechürüm teshkilati ötken hepte imza qoyush herikiti qozghap, Uyghur kishilik hoquq rehbiri rabiye qadir xanimning tutqundiki a'ile ezalirining qoyup bérilishini telep qilish herikiti bashlighan.

Xelq'ara kechürüm teshkilatining chaqiriqida, uning perzentliri, newriliri we qérindashliridin 30 dek kishining 2017‏-yildin béri héchqandaq qanuni resmiyetsiz tutup turuluwatqanliqi tekitlen'gen. Uningda kishilerning bu chaqiriqnamigha derhal imza qoyup, xitay re'isi shi jinpinggha ewetishi telep qilin'ghan.

Chaqiriqnamide, eger ularning xelq'ara birdek étirap qilghan birer xataliq sadir qilghanliqigha da'ir ishenchlik hem qayil qilarliq deliller bolmisa, tutqundiki barliq a'ile ezalirini shertsiz we derhal qoyup bérilishi telep qilin'ghan. Xelq'ara kechürüm teshkilatining ilgiri sürüshiche, xitay dariliri rabiye qadir xanimning oghulliri-ablikim abduréhim, qahar abduréhim, alim abduréhim ularning ayalliri, perzentliri, rabiye qadir xanimning hede-singilliri we inilirini öz ichige alghan 30 a'ile ezasi ikki yildin béri Uyghur aptonom rayonidiki melum bir tutup turush merkizide tutup turulmaqtiken. Chaqiriqnamide, "Radikalliqni tügitish merkezliri", "Siyasiy öginish merkezliri" yaki "Terbiyelesh arqiliq özgertish merkezliri" dégen namlardiki bu xil tutup turush orunlirining pütkül aptonom rayon miqyasida qurulghanliqi, bu orunlarning Uyghur we bashqa musulmanlarni xalighanche tutqun qilip, muddetsiz tutup turush bilen tonulghanliqi tekitlen'gen.

Chaqiriqnamide yene, rabiye qadir xanimning a'ile ezalirining a'ilisi bilen qerellik we tosqunluqsiz körüshüp turushi, xalighan adwokatni teklip qilishigha, ten jazasi we qopal mu'amilige uchrimasliqigha kapaletlik qilinishi telep qilin'ghan. Rabiye qadir xanim 2005‏-yili amérikigha dawalinishqa qoyup bérilgendin béri, uning a'ile ezaliri we uruq-tughqanliri izchil xitay hökümitining parakendichilikige uchrap kelgenidi.

Toluq bet