Хәлқара кәчүрүм тәшкилати тутқундики бузәйнәпниң қоюп берилишини йәнә тәләп қилди

Мухбиримиз әркин
2019-07-29
Елхәт
Пикир
Share
Принт

Хәлқара кәчүрүм тәшкилати хитай һөкүмити тәрипидин тутқун қилинип 7 йиллиқ қамақ җазасиға һөкүм қилинған уйғур қизи - бузәйнәп абдурешитни қоюп беришкә чақириқ қилди.

Хәлқара кәчүрүм тәшкилатиниң бузәйнәп абдурешитни қоюп беришни тәләп қилиш һәрикити өткән йили башланған. Мәзкур тәшкилат 29‏-июл күни қайта һәрикәт қозғап, униң қоюп берилишини йәнә тәләп қилған.

Бүзәйнәп абдурешитниң йолдиши австралийә тәвәликидики уйғур болуп, у ата-аниси йоқлаш үчүн үрүмчигә барғанда тутқун қилинған. Мәлум болушичә, у 2017‏-йили 3‏-айниң 29‏-күни үрүмчидики ата-анисиниң өйидә тутқун қилинип, ақсуға елип кетилгән. Нөвәттә бузәйнәпниң 2017‏-йили 6‏-айда қанунсиз 7 йиллиқ қамақ җазасиға һөкүм қилинип, үрүмчи аяллар түрмисидә йетиватқанлиқи мәлум.

Йеқинда униң австралийәдики йолдиши алмас низамидин австралийә һөкүмитиниң дипломатик қаналларни ишқа селип, аялини қутқузуп чиқишини тәләп қилған. Униң чақириқи австралийә таратқулирида хели зор ғулғула қозғиған иди. Хәлқара кәчүрүм тәшкилати 29‏-июл қайта елан қилған чақириқида кишиләрниң хитай рәиси ши җинпиңға хәт йезип, бузәйнәпниң хәлқара бирдәк етирап қилған бирәр хаталиқ садир қилғанлиқиға даир ишәнчлик дәлил болмиса, униң дәрһал вә шәртсиз қоюп берилишини, униң адвокати вә аилиси билән қәрәллик учришип турушиға, тән җазаси вә қопал муамилигә учримаслиқиға капаләтлик қилиниши, зөрүр болған теббий ярдәмгә еришишигә йол қоюлушини тәләп қилиши чақирилған.

Бузәйнәп абдурешит илгири мисирда икки йил диний илим тәһсил қилип, 2017‏-йили үрүмчигә қайтип барған. У австралийәгә чиқип, йолдиши билән җәм болуш үчүн виза рәсмийитини күтүп турғанда хитай һөкүмитиниң уйғурларни кәң көләмлик тутқун қилиш һәрикити башлинип кәткән. Хәлқара кәчүрүм тәшкилатиниң чақириқида бузәйнәп абдурешитниң тутқун қилиниши хитайниң уйғурларни кәң көләмлик бастуруш һәрикитиниң бир парчиси икәнлики, униң тутқунда тән җазасиға вә қопал муамилигә учраш еһтималдин қаттиқ әндишә қиливатқанлиқи тәкитләнгән.

Пикирләр (0)
Share
Толуқ бәт