Xelq'ara kechürüm teshkilati tutqundiki buzeynepning qoyup bérilishini yene telep qildi

Muxbirimiz erkin
2019-07-29
Élxet
Pikir
Share
Print

Xelq'ara kechürüm teshkilati xitay hökümiti teripidin tutqun qilinip 7 yilliq qamaq jazasigha höküm qilin'ghan Uyghur qizi - buzeynep abduréshitni qoyup bérishke chaqiriq qildi.

Xelq'ara kechürüm teshkilatining buzeynep abduréshitni qoyup bérishni telep qilish herikiti ötken yili bashlan'ghan. Mezkur teshkilat 29‏-iyul küni qayta heriket qozghap, uning qoyup bérilishini yene telep qilghan.

Büzeynep abduréshitning yoldishi awstraliye tewelikidiki Uyghur bolup, u ata-anisi yoqlash üchün ürümchige barghanda tutqun qilin'ghan. Melum bolushiche, u 2017‏-yili 3‏-ayning 29‏-küni ürümchidiki ata-anisining öyide tutqun qilinip, aqsugha élip kétilgen. Nöwette buzeynepning 2017‏-yili 6‏-ayda qanunsiz 7 yilliq qamaq jazasigha höküm qilinip, ürümchi ayallar türmiside yétiwatqanliqi melum.

Yéqinda uning awstraliyediki yoldishi almas nizamidin awstraliye hökümitining diplomatik qanallarni ishqa sélip, ayalini qutquzup chiqishini telep qilghan. Uning chaqiriqi awstraliye taratqulirida xéli zor ghulghula qozghighan idi. Xelq'ara kechürüm teshkilati 29‏-iyul qayta élan qilghan chaqiriqida kishilerning xitay re'isi shi jinpinggha xet yézip, buzeynepning xelq'ara birdek étirap qilghan birer xataliq sadir qilghanliqigha da'ir ishenchlik delil bolmisa, uning derhal we shertsiz qoyup bérilishini, uning adwokati we a'ilisi bilen qerellik uchriship turushigha, ten jazasi we qopal mu'amilige uchrimasliqigha kapaletlik qilinishi, zörür bolghan tébbiy yardemge érishishige yol qoyulushini telep qilishi chaqirilghan.

Buzeynep abduréshit ilgiri misirda ikki yil diniy ilim tehsil qilip, 2017‏-yili ürümchige qaytip barghan. U awstraliyege chiqip, yoldishi bilen jem bolush üchün wiza resmiyitini kütüp turghanda xitay hökümitining Uyghurlarni keng kölemlik tutqun qilish herikiti bashlinip ketken. Xelq'ara kechürüm teshkilatining chaqiriqida buzeynep abduréshitning tutqun qilinishi xitayning Uyghurlarni keng kölemlik basturush herikitining bir parchisi ikenliki, uning tutqunda ten jazasigha we qopal mu'amilige uchrash éhtimaldin qattiq endishe qiliwatqanliqi tekitlen'gen.

Toluq bet