Xelq'ara kechürüm teshkilati: "Tutulghan Uyghur xitaygha qayturulmasliqi kérek!"

Muxbirimiz jewlan
2021-09-22
Share

21-Séntebir xelq'ara kechürüm teshkilatining tor bétide bérilgen melumattin qarighanda, xitayning telipi bilen marakeshte tutulup, 2 aydin béri qamaqta turuwatqan idris hesenning 22-séntebirde échilmaqchi bolghan soti 10-ayning 27-künige kéchiktürülgen.

Idris hesenning ayali buzeynur xanim xelq'ara kechürüm teshkilatigha qilghan sözide özining küchlük endishisini bildürüp: "Eger yoldishim xitaygha qayturuwétilse, men uni menggü körelmey qélishimdin ensireymen. Balilirim mektepte oquwatidu, ulargha dadisi bolmisa bolmaydu, yoldishimmu kün sanap turuwatidu, baldurraq qoyup bérilsem deydu. Eger u qoyup bérilmise, hemmimiz üchün chong kélishmeslik bolidu," dégen.

Xelq'ara kechürüm teshklati marakesh hökümitidin idris hesenni xitaygha qayturup bermesliki kéreklikini, bolmisa uning teqdirining xeterlik bolidighanliqini dawamliq tekitlep kelgen. Mezkur teshkilatning xelq'ara kirzislargha inkas qayturush bölümining bashliqi joni mariyér mundaq dégen: "Idris hesen yoluqqan kirzis xitayning Uyghurlarni her yerde kontrol qilishqa urunuwatqanliqini éniq körsitip béridu. Bashqa döletlerni Uyghurlarni xitaygha ötküzüp bérishke yaki ularni qoghlap chiqirishqa qistash Uyghurlarda éghir qorqunch, wehime peyda qilmaqta. Marakeshke kelsek, eger idris hesenni Uyghurlar we bashqa az sanliq milletler kek kölemde tutulup dehshetlik qiynashlargha uchrawatqan xitaydek bir döletke qayturuwetse, xelq'ara qanunda belgilen'gen mes'uliyitige xilapliq qilghan bolidu".

Közetküchilerning bildürüshiche, idris hesenning sotining bu qétim kéchiktürülüshi xitay bilen xelq'ara kishilik hoquq qoghdighuchiliri arisidiki bir meydan küch sinishishning yene dawam qiliwatqanliqini körsitidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet