Xelq'ara kechürüm teshkilati birleshken döletler teshkilatini Uyghurlar mesiliside heriketke ötüshke chaqirdi

Muxbirimiz irade
2021-10-13
Share

Xelq'ara kechürüm teshkilati 11-öktebir küni birleshken döletler teshkilatigha chaqiriqname élan qilip, ulardin xitayning Uyghurlargha qaritiwatqan éghir kishilik hoquq depsendichilikliri üstidin tekshürüsh élip bérishni telep qilghan.

Xelq'ara kechürüm teshkilati b d t gha yazghan ochuq xétide "Xelq'ara kechürüm teshkilati xitayning shinjang Uyghur aptonom rayonidiki éghir kishilik hoquq depsendichiliklirini qattiq eyibleydu. Xelq'ara jem'iyet choqum xitay hökümiti rayonda yürgüziwatqan éghir kishilik hoquq depsendichilikini qattiq eyiblishi kérek. Yeni adalet telep qilishi, mes'uliyiti barlarni jawabkarliqqa tartishi kérek," dégen.

Melum bolushiche, xelq'ara kechürüm teshkilatining herqaysi ellerdiki shöbiliri "Lagér tutqunlirigha erkinlik" témisda namayishlarni uyushturghan bolup, bu namayishlar 7-öktebir künidin bashlap london, parizh, madrid, sénigalning dakar shehiri, finlandiyening xélsinki shehiri, péruning lima shehiri, portugaliyening lisbon shehiri, gollandiyening gaga shehiri we amérikaning washin'gton alahide rayoni qatarliq 10 sheherdiki xitay elchixanisi aldida ötküzülgen. Bu namayishtiki "Lagér tutqunlirigha erkinlik" témisidiki imza qoyush herikitide 320 mingdin artuq kishi imza qoyghan. Ular 60 tin artuq ghayib qiliwétilgen we lagélargha qamalghan kishining aqiwitini xitay elchixanisidin sürüshte qilip mektub sun'ghan.

Xelq'ara kechürüm teshkilatining bash katipi agnés kallamard bayanattiki sözide b d t ning choqum dunyaning her qaysi jaylirida nechche yüzminglighan kishining adalet telep qilip qoyghan imzasigha diqqet qilishi kéreklikini eskertken we "Her bir imza xitayning bu sistémiliq ziyankeshlikni derhal toxtitishigha qilin'ghan biwasite chaqiriqtur. Xitay hökümiti lagérlarda we türmilerde xalighanche qamalghan barliq kishilerni derhal qoyup bérishi, jaza lagéri sistémisini bikar qilip, shinjangdiki musulmanlargha qaritilghan sistémiliq hujumni axirlashturushi kérek," dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet