Xelq'ara kechürüm teshkilati: "Xitay hökümitining Uyghurlarni basturuwatqanliqini yoshurghudek yéri qalmidi"

Muxbirimiz erkin
2018-10-26
Share

Xelq'ara kechürüm teshkilati 25‏-öktebir ataqliq Uyghur ziyaliysi ilham toxtining tughulghan küni munasiwiti bilen maqale élan qilip, uninggha hemdem bolidighanliqi we uning küresh nishanini qollaydighanliqini bildürdi.

"Xitay hökümitining shinjangdiki Uyghur musulmanlirini basturuwatqanliqini yoshurghudek yéri qalmidi" serlewhilik maqalida xitay da'irilirining rayondiki Uyghurlarni, shuningdek bashqa diniy we étnik guruppilarni basturush herikiti Uyghur aptonom rayonining weziyitini qorqunchluq halgha keltürüp qoyghanliqi tekitlen'gen.

Maqalide yene xitayning bu rayondiki wehshiylerche basturushigha qarimay, yighiwélish lagérliri bilen yerlik medeniyetni yoqitish qilmishlirini dawamliq türde inkar qiliwatqanliqi bildürülgen.

Maqalida gerche xitay özining qilmishini inkar qiliwatqan bolsimu, lékin buning rastliqi nurghun kishiler teripidin delillen'genliki eskertilip, mundaq déyilgen: "Buningdiki jawabkarliq choqum sürüshtürülüshi, Uyghurlarning qayta basturulush nishanigha aylinip qalmasliqigha kapaletlik qilinishi kérek. Kéngesh palata ezasi marku rubiyo özining 'wol-strét zhurnili' gézitide élan qilghan maqaliside éytqinidek amérika dölet mejlisi we xelq'ara jem'iyet a'ililerning ayriwétilishi, ten jazasi, hetta öltürülüshige emdi qarap turmasliqi lazim. Amérika rehberliri bu rezillikke qarshi siyasiy iradisini otturigha qoyushi kérek."

Maqalida tekitlinishiche, amérika tashqi ishlar ministirliqi bashqa hökümetler bilen birliship, b d t we bashqa xelq'ara organlarda xitaygha qaritilghan bésimni kücheytishi, shinjangdiki qorqunchluq kishilik hoquq depsendichilikige qarshi jama'et pikiri toplap, uninggha yer sharining diqqitini tartishi kérek iken.

Maqalining axirida kishilerni ilham toxtini qoyup bérishni telep qilish iltimasigha qol qoyushqa, Uyghur aptonom rayonluq 1‏-türmige atkritka ewetip, uning tughulghan künini tebrikleshke chaqirghan.

Ilham toxti Uyghurlarning xitay asasi qanunidiki heq-hoquqlirini telep qilghanliqi üchün 2014‏-yili 1‏-ayda qolgha élin'ghan. Shu yili 9-ayda "Bölgünchilik" bilen eyiblinip, muddetsiz qamaq jazasigha höküm qilin'ghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet