Muxbir néysin wandérklép “Xelq'ara kechürüm teshkilati” ning mukapatigha érishti

Kanadadiki “Yershari we pochta” gézitining muxbiri néysén wandérklép “Xelq'ara kechürüm teshkilati kanada shöbisi” ning 2018-yilliq mukapatigha érishti.

Mezkur gézitning 17-dékabirdiki xewiride éytilishiche, néysin wandérklép izchil xitay hökümiti zor küch bilen kéngeytiwatqan “Yighiwélish lagérliri” heqqide munasiwetlik xewerlerni ishlep gherb dunyasini alaqidar ehwallardin xewerdar qilip kéliwatqanlarning biri iken.

“Xelq'ara kechürüm teshkilati kanada shöbisi” ning bu mukapat heqqidiki bayanatida “Terbiyelesh merkezliri zamanimizdiki eng nomussiz, shundaqla zor kölemlik bolghan insan heqliri depsendichiliki” dep körsitilidu. Mezkur mukapatni bahalash komitétining ezaliridin bil shillér bu heqte söz qilip: “Xitay hökümitining düshmenlikke tolghan nazaret muhitida turup bu xildiki ehwallar heqqide xewer yézish ghayet zor pidakarliq we shija'et telep qilidu. Néysén bularning her ikkilisini toluq namayan qildi” dégen.

Melum bolushiche, néysin wandérklép Uyghur diyaridiki xizmet pa'aliyiti jeryanida köp qétim xitay saqchilirining parakende qilishigha, hetta saqchixanigha élip bérip soraq qilishigha duch kelgen bolsimu, izchil Uyghur jem'iyiti duch kéliwatqan türlük krizislar heqqide xewer we obzor maqaliliri yézip kelmekte iken.