Amérikadiki kishilik hoquq organliri jow baydén hökümitini kishilik hoquqni xitay siyasitining muhim noqtisi qilishqa chaqirdi

Muxbirimiz irade
2021-02-18
Share

Amérikadiki Uyghur kishilik hoquq qurulushi qatarliq 24 teshkilat birlikte prézidént jow baydén'gha imzaliq xet yollap, baydén hökümitini amérika-xitay munasiwetliride kishilik hoquqni aldinqi orun'gha qoyushqa chaqirdi.

Ular 17-féwral küni élan qilghan ochuq xétide töwendikilerni bayan qilghan: "Biz xitaydiki kishilik hoquq weziyitini yaxshilashqa özini béghishlighan 24 teshkilat we shexs bolush süpitimiz bilen, hökümitingizni kishilik hoquq mesilisini amérika-xitay munasiwetliride muhim orun'gha qoyushqa chaqirimiz. . . Xitay hökümitining dölet ichi we sirtidiki kishilik hoquq depsendichilikining da'irisi we kölimi intayin zor bolup, bu mesilide tüptin burulush bolushini telep qilimiz. Ilgiri qollinilghan nurghun tedbirler emdi uninggha mas kelmeydu yaki yéterlik derijide küchlük emes."

Bu bayanatta ular amérika hökümitini xitayning kishilik hoquq depsendichiliklirige qarshi xelq'araliq hemkarliq teshkillesh, 2022-yilliq béyjing qishliq olimpik musabiqisini bir déplomatik mesile dep qarash, xitayning teshwiqat heriketlirige qarshi turush, qaratmiliq jaza tedbirlirini dawamlashturush, kishilik hoquq pa'aliyetchiliri we organlirini qollash qatarliq bir qatar tekliplerni otturigha qoyghan.

Yuqiriqi imzaliq xette bu teshkilatlar yene amérika hökümitining bir qi'ism yuqiri derijilik emeldarlirining "Amérika hökümiti xitay hökümitini xelq'ara sistémini süy'istimal qilip qalaymiqan qilghanliqi üchün jawabkarliqqa tartishi kérek," dégen bayanlirini qarshi alidighanliqinimu eskertken.

Mezkur imzaliq xetke Uyghur kishilik hoquq qurulushidin bashqa yene Uyghur herikiti teshkilati, amérika Uyghur birleshmisi, kishilik hoquqni közitish teshkilati, erkinlik sariyi, puqralar küchi, xongkongni közitish teshkilati qatarliq 24 teshkilat imza qoyghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet