Xelq'ara kishilik hoquq teshkilatliri dolqun eysaning b d t yighinigha qatnashturulmighanliqini eyiblidi

Muxbirimiz erkin
2018-04-20
Élxet
Pikir
Share
Print

Bezi xelq'ara kishilik hoquq teshkilatliri arqa-ariqidin bayanat élan qilip, dunya Uyghur qurultiyining re'isi dolqun eysaning nyu-york shehiride b d t ning yerlik milletler mesilisi heqqidiki yighinigha qatnashturulmighanliqini eyiblidi.

Wakaletsiz milletler we xelqler teshkilatining bayanatida, eger b d t özining kishilik hoquq wedisi we ammiwi teshkilatlarning ishtirakigha jiddiy qarisa, dolqun eysani yighin'gha kirgüzmesliktek bu adaletsizlikni derhal tüzitishi, uning yighin'gha qatnishishigha yol qoyushi kéreklikini tekitligen.

B d t ijtima'iy ‏-iqtisadiy kéngishining 17‏-nöwetlik yighini 16‏-aprél b d t ning nyu-yorktiki binasida ötküzülgen. Bu qétimqi yighinda yerlik milletler mesilisi muzakirige qilin'ghan idi. Dolqun eysa bash shtabi gérmaniyediki "Tehdit astidiki xelqler teshkilati" gha wakaliten bu yighin'gha qatniship, Uyghurlarning mesilisini otturigha qoymaqchi bolghan.

"Wakaletsiz milletler we xelqler teshkilati" ning bildürüshiche, da'iriler dolqun eysaning yighin'gha qatnishishini testiqlighan bolsimu, lékin yighin'gha az qalghanda uning testiqi "Bixeterlik endishisi" seweblik yene bikar qilin'ghan we uning yighin'gha qatnishishini tosighan. Mezkut teshkilat b d t ning yardemchi bash katipi, xitay diplomati lyu jénminning bu yighin'gha rehberlik qilishini közde tutqanda uning tasadipiyliq emeslikini bildürdi.

Dolqun eysagha képil bolghan gérmaniyediki "Tehdit astidiki xelqler teshkilati" ning re'isi ulrix dél'i'us peyshenbe küni muxbirimizning ziyaritini qobul qilghanda, xitayning b d t organlirini monopol qilishqa uruniwtatqanliqini we kishilik hoquq sistémisigha meqsetlik buzghunchiliq qiliwatqanliqini bildürdi. Uning körsitishiche, dolqun eysaning yighin'gha qatnishishining ret qilinishi uning "B d t organlirini monopol qilishta melum netinjilerge érishkenlikining éniq signali" bolup, démokratik döletler derhal heriketke kelmise, buning aqiwiti éghir bolidiken.

Toluq bet