Хәлқара кишилик һоқуқни көзитиш тәшкилати америка һөкүмитини уйғур районидики әмәлдарларни тезрәк җазалашқа чақирди

Мухбиримиз ирадә
2019-05-30
Елхәт
Пикир
Share
Принт

Хәлқара кишилик һоқуқни көзитиш тәшкилати америка һөкүмитини хитайниң уйғур районидики әмәлдарлирини тезрәк җазалашқа чақирған.

Шиветсарийәдики нопузлуқ хәвәр органлиридин болған «шиветсарийә учурлири» гезитидә хәвәр қилинишичә, кишилик һоқуқни көзитиш тәшкилатиниң хитай ишлири директори софи ричардсон бу һәқтә сөз қилип: «америка һөкүмити хитайни наһайити җиддий иқтисадий тәдбирләр билән җазалимақчи, әмма у бу тәдбирләрни уйғур мусулманлириға еғир зулум йүргүзүватқан хитай әмәлдарлириға тәтбиқлашта тәрәддут қиливатиду» дегән.

Софи ханим сөзидә, америка һөкүмитиниң уйғур елидә инсанийәт кризисиға сәвәб болуватқан хитай әмәлдарлирини чоқум «йәршари магнетиски қануни» арқилиқ җазалиши вә буни дәрһал иҗра қилиши керәкликини әскәрткән.

У йәнә, уйғур елидики вәзийәтниң давамлиқ яманға қарап меңиватқанлиқини, вәзийәттә һәргизму яхшилиниш йүз бәрмигәнликиниму тәкитләп өткән.

Хәлқара кишилик һоқуқни көзитиш тәшкилати йеқинда иҗтимаий алақә васитилири арқилиқ «шинҗаңдики лагерларни тақа» хәштәги билән һәрикәт қозғиғаниди. Мәзкур орган бу һәрикәт арқилиқ рамзан ейи мунасивити билән бу мәсилигә йәниму көп диққәт қозғашни вә һөкүмәтләргә бесим шәкилләндүрүшни мәқсәт қилғаниди.

Мәзкур һәрикәт үчүн тәсис қилинған мәхсус тор сәһиписи инглизчә, хитайчә, әрәбчә вә фирансузчә 4 хил тил бойичә тарқитилмақта.

Пикирләр (0)
Share
Толуқ бәт