Xelq'ara kishilik hoquqni közitish teshkilati amérika hökümitini Uyghur rayonidiki emeldarlarni tézrek jazalashqa chaqirdi

Muxbirimiz irade
2019-05-30
Share

Xelq'ara kishilik hoquqni közitish teshkilati amérika hökümitini xitayning Uyghur rayonidiki emeldarlirini tézrek jazalashqa chaqirghan.

Shiwétsariyediki nopuzluq xewer organliridin bolghan "Shiwétsariye uchurliri" gézitide xewer qilinishiche, kishilik hoquqni közitish teshkilatining xitay ishliri diréktori sofi richardson bu heqte söz qilip: "Amérika hökümiti xitayni nahayiti jiddiy iqtisadiy tedbirler bilen jazalimaqchi, emma u bu tedbirlerni Uyghur musulmanlirigha éghir zulum yürgüzüwatqan xitay emeldarlirigha tetbiqlashta tereddut qiliwatidu" dégen.

Sofi xanim sözide, amérika hökümitining Uyghur élide insaniyet krizisigha seweb boluwatqan xitay emeldarlirini choqum "Yershari magnétiski qanuni" arqiliq jazalishi we buni derhal ijra qilishi kéreklikini eskertken.

U yene, Uyghur élidiki weziyetning dawamliq yaman'gha qarap méngiwatqanliqini, weziyette hergizmu yaxshilinish yüz bermigenlikinimu tekitlep ötken.

Xelq'ara kishilik hoquqni közitish teshkilati yéqinda ijtima'iy alaqe wasitiliri arqiliq "Shinjangdiki lagérlarni taqa" xeshtegi bilen heriket qozghighanidi. Mezkur organ bu heriket arqiliq ramzan éyi munasiwiti bilen bu mesilige yenimu köp diqqet qozghashni we hökümetlerge bésim shekillendürüshni meqset qilghanidi.

Mezkur heriket üchün tesis qilin'ghan mexsus tor sehipisi in'glizche, xitayche, erebche we firansuzche 4 xil til boyiche tarqitilmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet