Uyghur kishilik hoquq qurulushi: "Uyghurlar mesilisige chétilidighan xitay emeldarlar choqum jazalinishi kérek"

Muxbirimiz sada
2019-06-26
Élxet
Pikir
Share
Print

Uyghur diyaridiki éghir kishilik hoquq depsendichilikige biwasite chétishliq bolghan xitay emeldarlirining "Yershari magnétiskiy qanuni" boyiche jazalinish teshebbusi künsayin éshiwatqan bir mezgilde 25-iyun Uyghur kishilik hoquq qurulushi bu heqte bir bayanat élan qildi.

25-Iyun küni mezkur teshkilat élan qilghan "Uyghur we bashqa türkiy milletlerni xorlashqa chétishliq xitay emeldarliri choqum jazalinishi kérek" serlewhilik bayanatta amérika hökümitini Uyghur diyaridiki kishilik hoquqni depsende qilghan "Xitay jinayetchiler" ge "Yershari magnétiskiy qanuni" ni tetbiqlashqa chaqirghan.

Bayanatta Uyghur kishilik hoquq qurulushining diréktori ömer qanat ependining sözliri neqil élin'ghan. U mundaq dégen: "Nöwette xitay hökümitining Uyghur diyaridiki Uyghur we bashqa türkiy milletlerni jaza lagérlirida qiyin-qistaqqa élishi heqqide toluq delil-ispatlar bar. Lagérdin qutulup chiqqanlarning shu yerde ölgenler heqqide bergen guwahliqi shu jinayetni sadir qilghuchilarning epti-beshirisini körsitip bermekte. 'yershari magnétiskiy qanuni' ning xitay emeldarlirini jazalashni nishan qilishi bir emeliy ish bolupla qalmay, kelgüside peyda bolmaqchi bolghan mushundaq jinayetlerning aldini élish üchün bir signal bolalaydu."

Bayanatta yene yéqindin buyan élan qilinip kéliwatqan doklatlardin jaza lagérlirida tutup turuluwatqan Uyghur tutqunlarning jismaniy we bashqa jehetlerdin izchil xorluqqa uchrawatqanliqini körüwalghili bolidighanliqi, buning tipik misali bolsa yazghuchi nurmuhemmet toxtining lagérgha élip kétilgendin kéyin besh ay dawalinishtin mehrum qalghanliqi, lagérdin qoyup bérilip bir aydin kéyin jan üzgenliki éytip ötülgen.

Bayanatning axirida "Yershari magnétiskiy qanuni" boyiche Uyghur diyaridiki jaza lagérining bash "Layiheligüchisi" bolghan Uyghur aptonom rayonluq partkomning sékrétari chén chüen'goning amérikigha wiza élip kirishining cheklinishi we uning chet'eldiki mal-mülüklirining tonglitilishi kérekliki teshebbus qilin'ghan.

Toluq bet