Xitay kishilik hoquq teshkilatini "Dolqun eysaning kimlikini körmeske saldi" dep eyiblidi

Muxbirimiz irade
2017-09-07
Share

Bügün, xitayning hökümet awazi hésablinidighan shinxu'a xewerler tori bir parche obzor élan qilip, xelq'ara kishilik hoquq közitish teshkilatini aldinqi küni élan qilghan doklati seweblik "Emeliyetni körmeske séliwaldi" dep eyiblidi.

Xelq'ara kishilik hoquqni közitish teshkilati aldinqi küni bir zor hejimlik doklat élan qilip, xitay hökümitining birleshken döletler teshkilatining kishilik hoquqqa munasiwetlik xizmet méxanizmini ajizlashturushqa urunuwatqanliqini tenqid qilghan.

Doklatta bu jehettiki tipik misallar qatarida Uyghur siyasiy pa'aliyetchi dolqun eysa köp qétim tilgha élinip, uning b d t diki yighin zaligha xitay hökümitining ichki jehette qilghan bésimi seweblik kirgüzülmigenliki bayan qilin'ghan.

Biraq, xitayning shinxu'a axbarati bügünki obzorida buninggha qarshi chiqip, dolqun eysaning "Xelq'ara saqchi teshkilati" tizimlikidiki kishi ikenlikini ilgiri sürgen.

Ular yene obzorda "Biz dolqun eysaning térror teshkilati bashliqi ikenlikini, uning bir qanche jinayi délo we térrorluq weqelirining gumandari ikenlikini köp qétim chüshendürgen bolsaqmu,  kishilik hoquq közitish teshkilati buninggha quliqini yopuruwaldi" dep waysighan.

Shinxu'a agéntliqi obzorida yene, xitayning kishilik hoquq tereqqiyatining intayin yaxshiliqini ilgiri sürüp "Buni kélip taghliq yézilarda namratliqtin qutulghanlardin, yézidin sheherlerge kirip ishlep sheherning renggareng hayatidin behrimen boluwatqan sehraliq ishchilardin, hökümetning yardimi bilen yaxshi turmush kechürüwatqan méyiplerdin sorap béqinglar" dégen.

Biraq, shinxu'a öz xewiride, xitayda erkin axbarat yoqluqini, chet'ellik muxbirlarning xalighan yerge bérip xalighan ademni ziyaret qilalmaydighanliqini, intérnét torining pütünley qamal qilin'ghanliqini, nurghun kishining chet'el axbaratlirigha özi bilgenni sözlep qoyghanliqi üchün türmide yétiwatqanliqini tilgha almighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.