Кишилик һоқуқ көзитиш тәшкилати: «явропа дөләтлири уйғурларни қайтурушқа болмайду»

Мухбиримиз әркин
2018-12-03
Елхәт
Пикир
Share
Принт

Кишилик һоқуқ көзитиш тәшкилати явропа иттипақиға әза дөләтләрниң ички ишлар министирлириға мәктуп йезип, уйғур районидин кәлгән түркий мусулманлирини хитайға қайтурушни дәрһал тохтитишқа чақирған.

Мәзкур тәшкилатниң явропа иттипақиға әза 29 дөләтниң ички ишлар министирлириға язған мәктупи 3‏-декабир күни елан қилинди. Мәктупта, бу дөләтләр уйғур районидин кәлгән түркий мусулманларниң қайтурулса қандақ хорлуққа учрайдиғанлиқини бирму-бир, әтраплиқ, адил көздин кәчүрмәй туруп уларни хитайға мәҗбурий қайтурушқа болмайдиғанлиқи билдүрүлгән.

Мәктупта мундақ дейилгән: «явропа иттипақи һөкүмәтлири хитайдин кәлгән түркий мусулманлириниң панаһлиқ илтимасини тезлитиши, шундақла хитай һөкүмитиниң муһаҗирәттики түркий мусулманларни һәйвә қилишини тәкшүрүши вә буниңға чарә қилиши керәк».

Кишилик һоқуқни көзитиш тәшкилати өткән бир йил ичидә хитайниң бир милйондәк уйғурни тутқун қилип, йиғивелиш лагерлириға қамиғанлиқи, тутқунларниң бу лагерларда еғир тән җазасиға вә хорлашқа учраватқанлиқини дәлиллигән иди.

Мәктупта, кишилик һоқуқ көзитиш тәшкилатиниң явропа иттипақи ишлири директори лоте лейч, бәзи явропа дөләтлириниң түркий мусулманларни хитайға қайтурушни тохтатқанлиқини муәййәнләштүрүп, «бирақ бу, хитай шинҗаңдики кәң көләмлик бастурушни тохтатқичә явропа иттипақиниң омумйүзлүк мәйданиға айлиниши керәк» дегән.

Мәзкур мәктуп б д т кишилик һоқуқ кеңишиниң йиғини 3‏-декабир аз санлиқ милләтләр мәсилисини музакирә қилған күни елан қилинған. Мәзкур йиғинда д у қ ниң вәкили петир ервиң сөз қилип, мәзкур мәсилини оттуриға қойған. У уйғур мусапирлирини хитайға қайтурушқа болмайдиғанлиқи, улар хитайға қайтурулса җазалинидиғанлиқи, хитай әлчиханилириниң уйғурларға паспорт бәрмәйдиғанлиқини тәкитлигән.

У йиғинда йәнә дөләтләрниң германийә билән шиветсийәни үлгә қилип, уйғурларни хитайға қайтурушни тохтитишини, сиясий панаһлиқ илтимасини тезлитишни тәләп қилған. Йеқинда германийә билән шиветсийә буйруқ чүшүрүп, уйғурларни хитайға қайтурушни тохтатқанлиқини елан қилған иди.

Пикирләр (0)
Share
Толуқ бәт