Kishilik hoquq közitish teshkilati: "Yawropa döletliri Uyghurlarni qayturushqa bolmaydu"

Muxbirimiz erkin
2018-12-03
Share

Kishilik hoquq közitish teshkilati yawropa ittipaqigha eza döletlerning ichki ishlar ministirlirigha mektup yézip, Uyghur rayonidin kelgen türkiy musulmanlirini xitaygha qayturushni derhal toxtitishqa chaqirghan.

Mezkur teshkilatning yawropa ittipaqigha eza 29 döletning ichki ishlar ministirlirigha yazghan mektupi 3‏-dékabir küni élan qilindi. Mektupta, bu döletler Uyghur rayonidin kelgen türkiy musulmanlarning qayturulsa qandaq xorluqqa uchraydighanliqini birmu-bir, etrapliq, adil közdin kechürmey turup ularni xitaygha mejburiy qayturushqa bolmaydighanliqi bildürülgen.

Mektupta mundaq déyilgen: "Yawropa ittipaqi hökümetliri xitaydin kelgen türkiy musulmanlirining panahliq iltimasini tézlitishi, shundaqla xitay hökümitining muhajirettiki türkiy musulmanlarni heywe qilishini tekshürüshi we buninggha chare qilishi kérek".

Kishilik hoquqni közitish teshkilati ötken bir yil ichide xitayning bir milyondek Uyghurni tutqun qilip, yighiwélish lagérlirigha qamighanliqi, tutqunlarning bu lagérlarda éghir ten jazasigha we xorlashqa uchrawatqanliqini delilligen idi.

Mektupta, kishilik hoquq közitish teshkilatining yawropa ittipaqi ishliri diréktori loté léych, bezi yawropa döletlirining türkiy musulmanlarni xitaygha qayturushni toxtatqanliqini mu'eyyenleshtürüp, "Biraq bu, xitay shinjangdiki keng kölemlik basturushni toxtatqiche yawropa ittipaqining omumyüzlük meydanigha aylinishi kérek" dégen.

Mezkur mektup b d t kishilik hoquq kéngishining yighini 3‏-dékabir az sanliq milletler mesilisini muzakire qilghan küni élan qilin'ghan. Mezkur yighinda d u q ning wekili pétir érwing söz qilip, mezkur mesilini otturigha qoyghan. U Uyghur musapirlirini xitaygha qayturushqa bolmaydighanliqi, ular xitaygha qayturulsa jazalinidighanliqi, xitay elchixanilirining Uyghurlargha pasport bermeydighanliqini tekitligen.

U yighinda yene döletlerning gérmaniye bilen shiwétsiyeni ülge qilip, Uyghurlarni xitaygha qayturushni toxtitishini, siyasiy panahliq iltimasini tézlitishni telep qilghan. Yéqinda gérmaniye bilen shiwétsiye buyruq chüshürüp, Uyghurlarni xitaygha qayturushni toxtatqanliqini élan qilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet