Yawropa ittipaqi: "Xitaydiki kishilik hoquq xatirisidin qattiq endishe qiliwatimiz"

Muxbirimiz erkin
2017-12-08
Élxet
Pikir
Share
Print

Yawropa ittipaqining xitaydiki wekiller ömiki bügün küni bayanat élan qilip, xitaydiki kishilik hoquq weziyitidin, bolupmu xitay puqralirining négizlik kishilik hoquqining ret qilishqa uchrawatqanliqidin qattiq endishe qiliwatqanliqini bildürdi.

Yawropa ittipaqi wekillerning ömikining mezkur bayanati 10‏-dékabir "Dunya kishilik hoquq küni" harpisida élan qilin'ghan. Bayanatta mundaq déyilgen: "Biz ötken bir yilda xitaydiki uchur erkinliki, ipade erkinliki, yighilish we tor erkinlikini öz ichige alghan omumiy weziyetning nacharliship kétishidin qattiq endishe qilip kelduq. Tibet we shinjangni öz ichige alghan rayonlarda kishilik hoquq qoghdighuchilirini, adwokatlarni, diniy étiqad erkinliki qatarliq tüp heq-hoquqlirini qollan'ghan puqralarni qolgha élish, tutqun qilish, jazlash dawamlip keldi," déyilgen.

Bayanatta yene xitay kishilik hoquq adwokati jyang tyenyong, ilham toxti qataraliq pa'aliyetchilerning türmidiki ehwalidin endishe qiliwtqanliqi eskertilip mundaq déyilgen: "Biz bu kishilerni derhal qoyup bérishni, kishilik hoquq pa'aliyetchilirige we ularning a'ile tawabatlirigha parakendichilik sélishni toxtitishni telep qilimiz".

Yawropa ittipaqi wekiller ömikining yuqiriqi bayanati amérikidiki "Uyghur kishilik hoquq qurulushi" teshkilati bayanat élan qilip, xelq'ara jama'etni Uyghurlarning weziyitige köngül bölüshke chaqirghan küni élan qilin'ghan. "Uyghur kishilik hoquq qurulushi" ning bayanatida kishilerni b d t ning bu yil tesis qilin'ghan tor bétige aktip ishtirak qilip, "Uyghurlarning tüp kishilik hoquqini qollap söz qaldürüshqa, bu arqiliq béyjinggha Uyghurlarning untup qélinmighanliqini bildürüsh" ke chaqirghan.

B d t bu yil mexsus tor béti tesis qilip, kishilerning söz qaldurush usuli arqiliq her qaysi ellerdiki kishilik hoquq depsendichiliklirini pash qilishigha imkaniyet yaritip bergen. "Uyghur kishilik hoquq qurulushi" bayanatida mundaq dégen: "Bu usul alaqidar shexslerning shi jinpinggha kishilik hoquqni ret qilish xelq'ara ölchemge xilap déyishi üchün bir purset".

Toluq bet