Kishilik hoquq teshkilatliri Uyghurlar diyaridin paxta import qilmasliqni teshebbus qildi

Muxbirimiz eziz
2020-09-01
Share

Uyghurlar diyaridiki "Mejburiy emgek" mesilisi heqqide köpligen delil-ispatlarning melum bolushigha egiship, barghanséri köp sahe buninggha munasiwetlik teminat zenjirlirini men'i qilish teshebbusigha awaz qoshushqa bashlidi. 31-Awghust küni bir qisim kishilik hoquq teshkilatliri amérika hökümitige qarashliq herqaysi tarmaqlarni Uyghurlar diyaridin kélidighan "Paxta mehsulatigha chétishliq barliq import pa'aliyitini toxtitish" qa chaqirdi.

"Muhapizetchi" gézitining 31-awghusttiki xewiride éytilishiche, amérika dölet xewpsizlik ministirliqi qarmiqidiki "Tamozhna we chégra mudapi'e idarisi" gha tapshurulghan oxshash mezmundiki ikki xil chaqiriqta Uyghurlarning dölet hakimiyiti arqa tirek boluwatqan mejburiy emgek sistémisida paxta mehsulatliri üchün ishlewatqanliqi, nöwette bu weziyetni "Paxta gulagi" dégen namda teswirleshning mumkin boluwatqanliqi köpligen ispatlar bilen körsitilgen. Shundaqla xitayning dunya boyiche eng chong paxta ishlepchiqarghuchi dölet ikenliki, xitaydiki paxta mehsulatining 84 pirsenti Uyghurlar diyaridin kélidighanliqi tekitlen'gen.

Xewerde éytilishiche, xitay hökümiti élan qilghan uchurlarda xitayning 2018-yilila Uyghurlar diyaridin sekkiz milyard amérika dolliri qimmitidiki kiyim-kéchek we toqumichiliq mehsulatliri éksport qilghanliqi éytilghan. En'gliyediki Uyghur pa'aliyetchi bu heqte toxtilip "Xitay hökümitining sherqiy türkistandiki heq we hoquq depsendichilikige nisbeten éytqanda bu xildiki importni cheklesh chaqiriqi peqet kichikkine bir tirishchanliq xalas. Emma mushuning özimu xitay hökümitining bu xil depsendichilikni toxtitishigha türtke bolush rolini oynaydu" dégen.
Melum bolushiche, yéqindin buyan xitay hökümitining éksport mehsulatliridiki Uyghurlarning mejburiy emgikige chétishliq chaqiriqlar köplep otturigha chiqiwatqan bolup, bu xil chaqiriqlar "Zamaniwi qullar emgiki" dep teripliniwatqan mejburiy emgekni chekleshte ijabiy rollarni oynaydiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet