Уйғур елидә «көчәт тикиш» намидики һашар әмгики башланған

Мухбиримиз ирадә
2020-04-02
Share

Йеқиндин буян уйғур елидики һәрқайси һөкүмәт тор бәтлиридә елан қилиниватқан хәвәрләрдә район миқясида мәҗбурий әмгәкниң давамлиқ түрдә йолға қоюлуватқанлиқи ашкариланмақта.

«Тәңритағ тори» ниң хәвиридин мәлум болушичә, һазир уйғур елидә көчәт тикиш мәвсуми башланған болуп, кәң хәлқ аммиси «көчәт тикиш» намидики һашар әмгикигә селинмақтикән. Бу хәвәрдә «ақсу коңтәйлик районидики милйон молуқ қақаслиқни көкәртиш қурулуши үчүн бирнәччә күндин буян вилайәт, шәһәрдики 10 миңдин көпрәк кадир, амминиң гүрҗәклирини көтүрүп қақаслиққа келип көчәт тикип орман бина қилғанлиқи» баян қилинған.

Хәвәрдә йәнә мунулар дейилгән: «ақсу коңтәйлик районидики милйон молуқ қақаслиқни көкәртиш қурулушида пиланланған омумий көләм 1 милйон 47 миң 100 мо болуп, буниң ичидә сүний бәрпа қилинидиған орман көлими 357 миң мо келиду. Қурулуш башланғандин буян вилайәт, шәһәрдики кадир, амма һәр йили әтияз вә күз пәслидә қурулуш райониға келип чоң көләмдә көчәт тикип орман бина қилишни қанат яйдурди.»

Хитай һөкүмити уйғур елидә һашар әмгикиниң ахирлашқанлиқини илгири сүргән болсиму, лекин даириләрниң охшимиған намларда уни изчил давамлаштуруп кәлгәнлики мәлум. Йеқинда иҗтимаий таратқуларда тарқалған көрүнүшләрму буни испатлап бәрмәктә. Бу син көрүнүшлиридә йеза аһалисиниң йол қурулуши, етиз-ериқ қурулуши қатарлиқ қурулушларда җисманий әмгәккә селиниватқанлиқи вә еғир җисманий әмгәк билән шуғуллиниватқанларниң 90 пирсәнтиниң аяллардин тәшкил тапқанлиқи диққәт қозғимақта.

Уйғур районидики һашар мәсилисини көзитип келиватқан көзәткүчиләр уйғур елидики әр әмгәк күчлириниң бир болса лагерларға, бир болса завутларға әп кетилгәнликтин һашар әмгикиниң асасән аялларниң зиммисигә чүшкәнликини мөлчәрлимәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.