Uyghur élide "Köchet tikish" namidiki hashar emgiki bashlan'ghan

Muxbirimiz irade
2020-04-02
Élxet
Pikir
Share
Print

Yéqindin buyan Uyghur élidiki herqaysi hökümet tor betliride élan qiliniwatqan xewerlerde rayon miqyasida mejburiy emgekning dawamliq türde yolgha qoyuluwatqanliqi ashkarilanmaqta.

"Tengritagh tori" ning xewiridin melum bolushiche, hazir Uyghur élide köchet tikish mewsumi bashlan'ghan bolup, keng xelq ammisi "Köchet tikish" namidiki hashar emgikige sélinmaqtiken. Bu xewerde "Aqsu kongteylik rayonidiki milyon moluq qaqasliqni kökertish qurulushi üchün birnechche kündin buyan wilayet, sheherdiki 10 mingdin köprek kadir, ammining gürjeklirini kötürüp qaqasliqqa kélip köchet tikip orman bina qilghanliqi" bayan qilin'ghan.

Xewerde yene munular déyilgen: "Aqsu kongteylik rayonidiki milyon moluq qaqasliqni kökertish qurulushida pilanlan'ghan omumiy kölem 1 milyon 47 ming 100 mo bolup, buning ichide sün'iy berpa qilinidighan orman kölimi 357 ming mo kélidu. Qurulush bashlan'ghandin buyan wilayet, sheherdiki kadir, amma her yili etiyaz we küz peslide qurulush rayonigha kélip chong kölemde köchet tikip orman bina qilishni qanat yaydurdi."

Xitay hökümiti Uyghur élide hashar emgikining axirlashqanliqini ilgiri sürgen bolsimu, lékin da'irilerning oxshimighan namlarda uni izchil dawamlashturup kelgenliki melum. Yéqinda ijtima'iy taratqularda tarqalghan körünüshlermu buni ispatlap bermekte. Bu sin körünüshliride yéza ahalisining yol qurulushi, étiz-ériq qurulushi qatarliq qurulushlarda jismaniy emgekke séliniwatqanliqi we éghir jismaniy emgek bilen shughulliniwatqanlarning 90 pirsentining ayallardin teshkil tapqanliqi diqqet qozghimaqta.

Uyghur rayonidiki hashar mesilisini közitip kéliwatqan közetküchiler Uyghur élidiki er emgek küchlirining bir bolsa lagérlargha, bir bolsa zawutlargha ep kétilgenliktin hashar emgikining asasen ayallarning zimmisige chüshkenlikini mölcherlimekte.

Toluq bet