Ürümchi shehiridiki 30 orunda xitay köchmenlirige "Shinjang kimliki" ni tarqitish orni tesis qilin'ghan

Muxbirimiz erkin
2017-09-15
Élxet
Pikir
Share
Print

Uyghur aptonom rayoni 15‏-séntebir xitayning ichki ölkiliridin kélip Uyghur rayonida yashaydighan xitay köchmenlirige kimlik tarqitishni tézlitip, ürümchi shehiridiki kimlik tarqitish yaki almashturush ornining sanini 30 gha köpeytken.

Burun xitaylarning kimlikini yerlik kimlikke özgertish yaki yéngi kimlik ishlep bérish xizmiti ürümchi shehiridiki 4 orunda béjiriletti. "Tengritagh tori"ning xewer qilishiche, da'iriler 15‏-séntebirdin bashlap ürümchi shehiride xitay köchmenlirige kimlik béjirish ornidin yene 26 ni tesis qilghan. Buning bilen ürümchi shehirining xitay köchmenlirige kimlik béjirish orni 30 gha köpeygen. Xewerde, Uyghur rayonining yerlik kimlikige iltimas qilghan xitay köchmenlirige 60 kün ichide yéngi kimlik béjirip bérilidighanliqi bildürülgen.

Xitay hökümiti xitay köchmenlirini Uyghur rayonigha köchüshke righbetlendürüp kelgen bolsimu, biraq buni 1990‏-yillarning otturilirigha qeder pilanliq yolgha qoyup kelgen idi. Közetküchilerning bildürüshiche, 2009‏-yili yüz bergen "5 Iyul weqesi"din kéyin bu siyasetni téximu keng qoyuwétip, ichkiridin chiqqan herqandaq xitay yerlik kimlikke iltimas qilsa derhal béjirip bérishke bashlighan. Xitayning bu siyasiti Uyghur teshkilatlirining tenqidige uchrap, "Bu Uyghurlarni kontrol qilish siyasitining bir parchisi" dep eyibligen.

Közetküchiler, bu siyaset Uyghurlarning medeniyet, til, turmush xasliqini yoqitip, ularning öz ana yurtida téximu az sanliq orun'gha chüshüp qélishini kücheytidighanliqini agahlandurup kelmekte. "Tengritagh tori"ning xewiride ashkarilishiche, ürümchi shehiri 2016‏-yili 11‏-aydin bashlap xitayning 11 ölkisidin kelgen xitay puqralirigha derhal yerlik kimlik béjirip bérishni yolgha qoyghan bolup, bu qétim buni xitayning 30 ölke we biwasite     qarashliq sheherlirining puqralirigha kéngeytken iken.

Toluq bet