Америка 7‏-ноябир күнини “коммунизм қурбанлириниң дөләтлик хатирә күни” дәп елан қилди

Мухбиримиз шөһрәт һошур
2017.11.08

Америка түнүгүн 7-ноябир күнини “коммунизм қурбанлириниң дөләтлик хатирә күни” қилип бекиткәнликини елан қилди.

Ақсарайниң тор бетидә елан қилинған бу һәқтики баянатта, мәзкур хатирә күниниң сабиқ совет иттипақни вуҗудқа чиқарған өктәбир инқилабиниң инсанийәткә елип кәлгән зиянлириниң 100 йиллиқини әсләш мунасивити билән бекитилгәнлики әскәртилди.

Мәзкур баянатта, “өктәбир инқилабниң сиясий пәлсәписи әркинлик вә инсаний қәдир-қиммәтни рәт қилиду; шуңа өткән 100 йил мабәйнидә мәзкур инқилабниң түрткиси билән дуняға кәлгән диктатор дөләтләр дуняда 100 милйондин артуқ адәмниң җениға замин болған,” дейилди. Баянатта йәнә америка һөкүмитиниң коммунизмниң төмүр тапини астида һаятидин айрилғанлар вә һелиһәм бу тапан астида езиливатқанларни унтумайдиғанлиқи билдүрүлди.

Хәвәрләрдин мәлум болушичә, бу трамп һөкүмитиниң коммунизмға қарши мәйданини тунҗи қетим кәскин тонда тәкрарлиши әмәс. Доналд трамп, бу йил б д т да қилған сөзидә “коммунизмдин ибарәт бу бәрбат болған идеологийәгә чоқунғанлар дуняда зулум-заваллиқниң давамлишишиға һәссә қошиду,” дегән. Ақсарайниң мәзкур хатирә күн һәққидики баянати америка президенти доналд трампниң хитай зиярити һарписиға тоғра кәлди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.