Xitay qoralliq küchlirining baydiki kömürkan hujumchilirigha otchachar ishletkenliki melum bolmaqta

Muxbirimiz qutlan
2015-11-23
Élxet
Pikir
Share
Print

"Azadliq armiye géziti" ning xewirige qarighanda, xitay qoralliq küchlirining baydiki kömürkan hujumchilirigha qarita otchachar (rakétamiyut) qoral ishletkenliki melum bolmaqta.

Bügün xongkongda chiqidighan "Sumurgh" torimu "Azadliq armiye géziti" din neqil keltürüp, "Otchachar ishlitilip térrorchilar bitchit qilindi" serlewhilik mexsus xewer élan qilghan.

Xewerde déyilishiche, shinjang qoralliq saqchi qismining alahide etriti baydiki kömürkan hujumchilirini 56 kün iz qoghlap tintish arqiliq ötken hepte tengritéghining ichkiridiki melum bir öngkürde qorshiwalghan.

Ular öngkürge bésip kirishke pétinalmay, öngkürdikilerge kanay arqiliq nesihet qilish, yash aqquzidighan bomba qoyup bérish, hetta partlap-silkitish bombisi étish qatarliq wastilerni qollan'ghan. Bu wastilerning héchqaysisi ünüm bermigendin kéyin, xitay alahide etritining bashliqi öngkürge qaritip otchachar ishlitishke buyruq bergen. Yuqiri bésimliq köydürgüchi otchacharning zerbiside öngkürdiki on nechche gumandar sirtqa étilip chiqqan.

Xewerde yene otchacharning zerbiside sirtqa shiddet bilen étilip chiqqan on nechche pichaqliq gumandarning xitay qoralliq küchliri teripidin toluq étip öltürülgenliki ilgiri sürülgen.

Xitay qoralliq küchlirining baydiki kömürkan hujumchilirigha, jümlidin ayal we balilarnimu öz ichige alghan gumandarlargha qarita otchachar qoral ishletkenliki xelq'aradiki közetküchilerning diqqitini qozghimaqta.

Toluq bet