D u q re'isi rabiye qadir xanim xelq'arani “Bay kan weqesi” üstidin musteqil tekshürüsh élip bérishqa chaqirdi
2015.11.26
D u q re'isi rabiye qadir xanim xitayni “Bay kömür kan weqesi” üstidin musteqil xelq'ara tekshürüsh élip bérishqa yol qoyushqa chaqirdi. Rabiye qadir xanim bu chaqiriqni xitay amanliq küchlirining “Soghan kömür kan weqesi” ge qatnashqan 28 kishini otchachar bilen köydürüp öltürülgenlikige qarita otturigha qoyghan.
U, xitayning bu weqeni néme üchün 56 kündin kéyin élan qilghanliqigha so'al qoyup, “Eger parizhda térrorluq hujumi yüz bermigen bolsa, bu weqeni dawamliq yoshurun tutqan bolamti?” dégen.
Rabiye qadir xanim radi'omizgha bergen bayanatida yene, xelq'araning bezi tedbirlerni qollinip, xitay hökümitining hazirqi xelq'ara térrorluqqa qarshi turush weziyitidin paydilinip Uyghurlarni basturushni kücheytishidin saqlinishni telep qilghan.
D u q yéqinqi 3-4 kün ichide bay kan weqesini musteqil tekshürüshni telep qilghan 2-teshkilat. Buningdin burun xelq'ara kechürüm teshkilati musteqil tekshürüsh élip bérishni telep qilghan. Xelq'ara kechürüm teshkilati öltürülgenlerning arisida ayallar we balilarning bar-yoqluqini éniqlashni telep qilghan.
Xitay j x ministirliqi 13-noyabir parizhda térrorluq hujumi yüz bérip bir qanche sa'ettin kéyinla, bay kömür kan weqesige qatnashqan “Térrorchilar” ning öltürülüp, “Zor ghelibige” érishkenlikini élan qilghan.
Xitay “Azadliq armiye géziti” bolsa öngkürge kiriwalghan hujumchilarning otchachar qoralda köydürüp öltürülgenlikini bildürgen. Emma ayallar we balilar heqqide héchqandaq uchur bermigen idi.