Kongzi institutlirini ottura asiyagha kéngeytishke ehmiyet bérilmekte

Xitay Uyghur diyarining kongzi inistitutlirini ottura asiyagha kéngeytishtiki roligha ehmiyet bermekte. 30 - Iyul küni Uyghur aptonom rayonluq hökümet bilen xitay memliketlik kongzi instituti bash orgini birlikte ürümchide mexsus kongzi instituti bash organ kéngishining ezaliri yighinini échip, Uyghur rayonining xitayning yipek yoli iqtisadiy belwéghi pilanini ishq ashurush jeryanida etraptiki döletlerge kongzi institutliri we xitay tilini kéngeytishte oynaydighan roli hem bashqa mesililerni muhakime qilghan.

Tengri tagh torining bu heqtiki uchurida qeyt qilinishiche, Uyghur aptonom rayoni re'isi shöhret zakir, mu'awin re'is erkin tuniyaz qatarliqlar we 15 dölettiki kongzi inistitutlirining kéngesh ezaliri, meslihetchiliri we bashqa wekiller qatnashqan. Shöhret zakir söz qilip, kongzi institutining xizmetlirige aptonom rayonluq hökümet we partkomning alahide ehmiyet bériwatqanliqini tekitlesh bilen birge 2009 - yili memliketlik kongzi instituti bash shitabi, yeni, xitay tilini omumlashturush ishxanisining küch chiqirishi bilen xitay tilini ottura asiyagha kéngeytish bazisining Uyghur rayonida qurulghanliqi we yette yildin buyan Uyghur rayonining etraptiki döletler bilen qoshna bolush we medeniyet jehettiki yéqinliqidin paydilinip, xitay tilini ottura asiya döletlirige kéngeytishte rol oynighanliqini ilgiri sürgen.

U, shangxey hemkarliq teshkilati bilen aktip hemkarliship, ilgiri - kéyin 6 dölette 10 kongzi instituti qurushni ishqa ashurghanliqini bildürgen.

Xewerlerdin melum bolushiche, nöwette xitay ma'arip da'iriliri Uyghur diyarining ottura asiyadiki jumhuriyetler bilen til, medeniyet, din we bashqa jehetlerdiki yéqinliqidin paydilinip, bir qisim Uyghur, qazaq we bashqa millet oqutquchilirinimu qoshna ottura asiyadiki jumhuriyetlerde xitay tilini oqutush ishlirini élip bérishqa ewetmekte, uningdin bashqa yene ürümchini merkez qili, shinjang uniwérsitéti, tibbiy uniwérsitét we bashqa uniwérsitétlargha ottura asiya rayonidiki milletlerdin köplep oqughuchilarni qobul qilip ularni terbiyilesh ishlirini kücheytmekte iken.